Memleket basshysy Qasym-Jomart Toqaev búgin Halyqaralyq volonterler forýmyna qatysyp, volonterlikti damytý jáne halyqaralyq qaıyrymdylyq uıymdarynyń yntymaqtastyǵyn nyǵaıtý perspektıvalary týraly aıtty, dep habarlaıdy «Adyrna» tilshisi.
«Volonterlik qozǵalysty uzaqmerzimdi grant berý arqyly yntalandyrý kerek. Bul rette memlekettik jáne jeke grant berýshiler arasynda turaqty seriktestik ornatyp, otandyq jáne halyqaralyq donorlardyń bir-birimen nátıjeli yntymaqtastyǵyn qalyptastyrý mańyzdy. Volonterlik jáne qaıyrymdylyq isterdi ınstıtýttyq turǵyda qoldaý ınfraqurylymyn dáıekti túrde damytqan jón. Ol úshin volonterlerdiń ulttyq jáne aımaqtyq deńgeıdegi front-ofısiniń uıymdastyrýshylyq, tehnıkalyq jáne kadrlyq áleýetin kúsheıtý qajet»,—dedi prezıdent.
Sondaı-aq Qasym-Jomart Kemeluly volonterlik qyzmet salasyndaǵy halyqaralyq yntymaqtastyqty odan ári nyǵaıtýǵa jáne ilgeriletýge erekshe nazar aýdarý qajettigin atap ótti.
«Men ózim eriktilerdi barynsha qoldaımyn. Sizderdiń tabandy jumystaryńyzdy joǵary baǵalaımyn. Bizdiń volonterler Iordanııa, Kenııa, Taıland jáne Túrkııa elderine arnaıy baryp, tájirıbe jınaqtady. Osy tusta, men Qazaqstan eriktilerine qoldaý kórsetip júrgen BUU ókilderine alǵys aıtamyn. Byltyr elimizde Ortalyq Azııa volonterleriniń alǵashqy forýmy ótti. Osyndaı mańyzdy sharalar aldaǵy ýaqytta da jalǵasady»,—dedi ol.
