قۇرىلىس ساپاسىنا قالالىق ءماسليحات دەپۋتاتتارىنىڭ كوڭىلى تولماي وتىر
ەلورداداعى تانىمال عيماراتتاردىڭ ءبىرى – "ماڭگىلىك ەل" قاقپاسىن جوندەۋگە 600 ميلليون تەڭگە قاراجات كەرەك.
"نىسان جاۋىن-شاشىن مەن ەرىگەن قار سۋىنىڭ استىندا قالادى. بۇل ماسەلەگە بەي-جاي قاراماۋ كەرەك",- دەدى قالا اكىمىنىڭ ورىنباسارى نۇرلان نۇركەنوۆ ءماسليحاتتىڭ كەزەكتى سەسسياسىندا.
ونىڭ ايتۋىنشا، بۇل ماڭداعى جەراستى جولىن سالۋ جۇمىسى وتە ساپاسىز جۇرگىزىلگەن.
"جىل سايىنعى جوندەۋ جۇمىسى بۇل كەمشىلىكتى جويا المايدى. تولىقتاي جوندەۋ جۇرگىزۋگە شامامەن 600 ميلليون تەڭگە قاجەت", - دەدى نۇركەنوۆ.
ەلوردالىق دەپۋتات سەرگەي سولودوۆنيكوۆ بولسا، ماسەلە مۇنىمەن بىتپەيدى دەپ وتىر. عيماراتتا سۋ وقشاۋلاۋ جۇيەسى دە دۇرىس جاسالماعان.
ءماسليحات دەپۋتاتىنىڭ ويىنشا، نىساننىڭ جارامسىز بولىپ قالۋىنا جول سالۋ ەرەجەلەرىنىڭ ساقتالماۋى سەبەپ بولعان. سالدارىنان جەراستى جولىنا ەرىگەن قار سۋى جينالادى.
