اباي وبلىسىندا ورمان ءورتى شارپىعان اۋدان اكىمى اۋىستى، - دەپ حابارلايدى "ادىرنا" ءتىلشىسى وبلىس اكىمىنىڭ ءباسپاسوز قىزمەتىنە سىلتەمە جاساپ.
اباي وبلىسىنىڭ اكىمى نۇرلان ۇرانحاەۆتىڭ وكىمىمەن ايدار يبراەۆ بورودۋليحا اۋدانىنىڭ اكىمى بولىپ تاعايىندالدى. ءوڭىر باسشىسىنىڭ اۋدان وكىلدەرىمەن كەزدەسۋى ءبىر مينۋت ۇنسىزدىكپەن باستالدى. نۇرلان ۇرانحاەۆ جاڭا اكىمدى تانىستىرىپ، وبلىستىڭ ەكونوميكالىق ءوسىمىن قامتاماسىز ەتۋ جانە الەۋمەتتىك-ەكونوميكالىق كورسەتكىشتەردى جاقسارتۋ ءۇشىن بارلىق مۇمكىندىكتەردى پايدالانۋدى تاپسىردى.
ايدار يبراەۆ 1979 جىلى 27 مامىردا شىعىس قازاقستان وبلىسى، كۇرشىم اۋدانى، اقشي اۋىلىندا دۇنيەگە كەلگەن. شىعىس قازاقستان مەملەكەتتىك ۋنيۆەرسيتەتىن بىتىرگەن. مەملەكەتتىك ورگانداردا جانە مادەنيەت سالاسىندا جۇمىس تاجىريبەسى بار.
2004 جىلدان بەرى شىعىس قازاقستان وبلىسى اكىمىنىڭ اپپاراتىندا ءتۇرلى قىزمەتتەردى اتقارعان. ۇلان اۋدانى اكىمىنىڭ ورىنباسارى، اكىم اپپاراتىنىڭ باسشىسى، جارما اۋدانى اكىمىنىڭ ورىنباسارى قىزمەتتەرىن اتقارعان. 2022 جىلدىڭ قازان ايىنان باستاپ اباي اۋداندىق مادەنيەت، تىلدەردى دامىتۋ جانە مۇراعات ىستەرى باسقارماسىنىڭ باسشىسى بولدى.
"ادىرنا" ۇلتتىق پورتالى
