فوتو: gov.kz
«قازاقستان بارىسى» اتاعىن ەكى مارتە جەڭىپ العان پالۋان ايبەك نۇعىماروۆ اياگوز اۋدانىنىڭ اكىمى لاۋازىمىنا تاعايىندالدى. اباي وبلىسىنىڭ اكىمى بەرىك ءۋالي جاڭا باسشىنى جەرگىلىكتى تۇرعىندارعا تانىستىردى، دەپ حابارلايدى "ادىرنا".
39 جاستاعى نۇعىماروۆ اباي اۋدانىنداعى قۇندىزدى اۋىلىندا دۇنيەگە كەلگەن. سەمەي مەملەكەتتىك پەداگوگيكالىق ينستيتۋتىن «دەنە شىنىقتىرۋ» ماماندىعى بويىنشا تامامداعان. ەڭبەك جولىن سەمەي قالاسىندا قازاق كۇرەسى بولىمىندە وقىتۋشى-جاتتىقتىرۋشى بولىپ باستاعان. سپورت مەكتەپتەرىندە نۇسقاۋشى-ادىسكەر، قازاق كۇرەسىنەن جاتتىقتىرۋشى-وقىتۋشى بولىپ ەڭبەك ەتكەن.
ول قازاق كۇرەسىنەن بىرنەشە دۇركىن الەم چەمپيونى. 2013 جانە 2019 جىلدارى «قازاقستان بارىسى»رەسپۋبليكالىق ءتۋرنيرىنىڭ جەڭىمپازى اتاندى. قازاق كۇرەسى مەن سامبودان حالىقارالىق دارەجەدەگى سپورت شەبەرى. كوپشىلىك ونى تۇيە پالۋان رەتىندە جاقسى تانيدى.
كەيىنگى جىلدارى نۇعىماروۆ اكىمشىلىك قىزمەتتەر اتقارىپ ءجۇر. سول ءۇشىن زاڭگەر ماماندىعىن مەڭگەرگەن. التى جىل بويى سەمەي قالاسىنداعى كولىك كوللەدجىنىڭ ديرەكتورى بولعان. اياگوز اۋدانى اكىمىنىڭ ورىنباسارى، اۋدان اكىمىنىڭ مىندەتىن اتقارۋشى قىزمەتتەرىن اتقارعان. ەندى اۋدان اكىمى اتانىپ وتىر.
