فرانتسيا استاناسىنىڭ ورتالىعىندا ءىرى ءورت شىعىپ، پاريجدەگى ەڭ كونە جابىق ازىق-تۇلىك بازارى – Marché des Enfants-Rouges تولىقتاي جانىپ كەتتى. بۇل تۋرالى Le Monde باسىلىمى جازدى، دەپ حابارلايدى «ادىرنا» ءتىلشىسى.
ءورت 11 قازاننان 12 قازانعا قاراعان ءتۇنى ءپاريجدىڭ III وكرۋگىندەگى برەتان كوشەسىندە بولعان.
وقيعا تۋرالى ءپاريجدىڭ ورتالىق وكرۋگىنىڭ مەرى اريەل ۆەيل الەۋمەتتىك جەلىدەگى پاراقشاسىندا مالىمدەدى.
ء«ورت باقىلاۋعا الىندى، الايدا بازار تولىعىمەن جويىلدى»، – دەپ جازعان ول.
فرانتسۋز باق-تارىنىڭ مالىمەتىنشە، ءورتتى ءسوندىرۋ كەزىندە ءورت سوندىرۋشىلەردىڭ ءبىرى ءوزىن جايسىز سەزىنگەن. باسقا زارداپ شەككەندەر تۋرالى اقپارات تۇسپەگەن.
ءورت شامامەن 1 000 شارشى مەتر اۋماقتى قامتىعان. سالدارىنان عيماراتتىڭ مەتالل قۇرىلىمدارىنىڭ ءبىر بولىگى وپىرىلىپ تۇسكەن. ءورت سوندىرۋشىلەر جالىننىڭ كورشىلەس عيماراتتارعا تارالۋىنا جول بەرمەگەن.
قازىر ءورتتىڭ شىعۋ سەبەبى انىقتالىپ جاتىر.
Marché des Enfants-Rouges بازارى 1615 جىلى قۇرىلعان جانە پاريجدەگى بۇگىنگە دەيىن جۇمىس ىستەپ كەلگەن ەڭ كونە جابىق ازىق-تۇلىك بازارى سانالعان. 1982 جىلى ول فرانتسيانىڭ تاريحي ەسكەرتكىشتەرى تىزىمىنە ەنگىزىلگەن.
بازار مارە تاريحي اۋدانىندا ورنالاسقان. ول جەرگىلىكتى تۇرعىندار مەن تۋريستەر اراسىندا تانىمال بولعان. مۇندا ازىق-تۇلىك دۇكەندەرى، مەيرامحانالار جانە الەمنىڭ ءتۇرلى ەلدەرىنىڭ تاعامدارىن ۇسىناتىن ساۋدا ورىندارى جۇمىس ىستەگەن.
