سۋ تاسقىنىنا بايلانىستى ەلىمىزدىڭ ءۇش وڭىرىندە سوتقا دەيىنگى تەرگەپ-تەكسەرۋ باستالدى، دەپ حابارلايدى "ادىرنا" ۇلتتىق پورتالى.
باس پروكۋراتۋرا بۇگىنگى كۇنى جەرگىلىكتى اۋقىمداعى توتەنشە جاعداي رەجيمى جاريالانعان 10 وبلىستا ۋاكىلەتتى مەملەكەتتىك ورگاندار تاسقىن سالدارىن جويۋ جانە ازايتۋ جونىندەگى شارالار قابىلداپ جاتقانىن حابارلادى.
"پروكۋراتۋرا ورگاندارى ناقتى ەلدى مەكەندەردى سۋ باسۋ، جولداردىڭ، كوپىرلەردىڭ، گيدروتەحنيكالىق جانە باسقا دا وبەكتىلەردىڭ قيراۋ سەبەپتەرىن بەلگىلەيدى. اتاپ ايتقاندا، بيۋدجەت قاراجاتىنىڭ ماقساتتى جۇمسالۋى، سۋ تاسقىنىنىڭ الدىن الۋ جونىندەگى جوسپارلاردىڭ ۋاقتىلىعى مەن تولىقتىعى زەرتتەلۋدە. قورىتىندىسى بويىنشا ءاربىر ۋاكىلەتتى ورگاننىڭ قىزمەتىنە ءتيىستى قۇقىقتىق باعا بەرىلەتىن بولادى. بۇگىنگى تاڭدا پروكۋرورلار اقتوبە، الماتى جانە اتىراۋ وبلىستارىندا سوتقا دەيىنگى 4 تەرگەپ-تەكسەرۋدى باستادى", – دەپ حابارلادى ءباسپاسوز قىزمەتى.
باس پروكۋراتۋرا توتەنشە جاعدايعا قاتىستى جالعان اقپارات تاراتپاۋدى، تەك رەسمي اقپارات كوزدەرىنە سەنۋگە شاقىردى.
