"لاي-باتپاققا باتقان" - باتىس قازاقستاندا سۋ تاسقىنى سالدارىنان ەر ادام كوز جۇمدى

3501
Adyrna.kz Telegram

باتىس قازاقستان ايماعىندا سۋ تاسقىنى سالدارىنان 1 ادام كوز جۇمدى. ال شىعىن بولعان مال-مۇلىكتە ەسەپ جوق، دەپ حابارلايدى "ادىرنا" ۇلتتىق پورتالى "قازاقپارات"-قا سىلتەمە كورسەتە وتىرىپ. 

بقو تج دەپارتامەنتى جاعدايعا قاتىستى مالىمدەمە جاسادى. شىڭعىرلاۋ اۋدانىنا قاراستى اقتاۋ اۋىلىنان 11 ناۋرىز كۇنى، ساعات 19.00-دە 1984 جانە 1977 جىلعى ەكى ەر ادام اقساي قالاسىنا قاراي تراكتورمەن شىققان.

14 ناۋرىز كۇنى ساعات 17.17-دە ولاردىڭ جوعالىپ كەتكەنى جونىندە حابار تۇسكەن. ءدال سول ۋاقىتتا بورلى اۋدانىندا سۋ تاسقىنى ورىن العان. ساعات 23.25-تە اقساي قالاسىنان «قپو ب.ۆ.» كومپانياسىنىڭ جول تالعامايتىن كولىگى ىزدەۋگە شىققان. الايدا جول بولماعاندىقتان، ساعات 03.00-دە ىزدەۋ توقتاتىلعان.

بقو پوليتسيا دەپارتامەنتىنىڭ ءباسپاسوز قىزمەتكەرى داريعا ءماجيتوۆانىڭ ايتۋىنشا، اتالعان ەر ادامدار اقتاۋ اۋىلىنا جاردەم بەرۋگە بارىپ، كەرى قايتقان كەزدە تراكتور بالشىققا باتىپ قالعان. بىرەۋى كومەك ىزدەپ كەتكەن دە، ەكىنشىسى، 1984 جىلعى ەر ادام اياعى اۋىرعاندىقتان، كۇتىپ قالعان.

«15 ناۋرىز كۇنى ءبورلى اۋدانى اقبۇلاق اۋىلىنان 9 شاقىرىم جەردە اشىق دالادان 1984 جىلعى ەر ادامنىڭ مۇردەسى تابىلدى. ونىڭ دەنەسىندە زورلىق-زومبىلىق بەلگىلەرى بولعان جوق. اتالعان دەرەك ادام ءولىمى رەتىندە تىركەلدى. ساراپتاما جۇرگىزىلۋدە. باستاپقى سەبەبى – سۋعا كەتكەن»، -  دەدى  د.ءماجيتوۆا. مۇنى "قازاقپارات" ءبولىستى.

بقو دەنساۋلىق ساقتاۋ باسقارماسىنىڭ ءباسپاسوز حاتشىسى ايناگۇل ساقپوسىنوۆانىڭ ناقتىلاۋىنشا، ەكىنشى ەر ادام ءبورلى اۋداندىق اۋرۋحاناسىنىڭ تەراپەۆتىك بولىمشەسىندە جاتىر. ونىڭ وڭ جاق وكپەسى قابىنعان. جاعدايى - اۋىر.

باتىس قازاقستانداعى سۋ تاسقىنى زارداپتارىن سەيىلۋ جانە جويۋ جۇمىستارى جالعاسىپ جاتىر. قازىرگى كۇنى 100-دەن استام كيىك سۋدان شىعارىلعان. 57 تۇرعىن ۇيدەن سۋ سورۋ جۇمىستارى اياقتالىپ، 275 ادام باسپانالارىنا ورالدى. دەگەنمەن جايىق وزەنىندەگى سۋ دەڭگەيى ءالى كوتەرۋلۋى مۇمكىن دەيدى ماماندار. ولار تۇرعىنداردى ساق، سەرگەك بولۋعا شاقىرادى.

ال تۇرعىندار جاۋاپتى مەكەمەلەر مەن ەل باسىندا جۇرگەن تۇلعالاردىڭ مۇنداي تابيعاتتىڭ توسىن مىنەزىنە دايىن بولماعانىن، دايىندىق جۇرگىزبەگەنىن ايتىپ وتىر.

"ادىرنا" ۇلتتىق پورتالى 

 

پىكىرلەر