ۆەنەسۋەلانىڭ اقپارات قۇرالدارى جەكسەنبى كۇنى كاراكاس اۋەجايىنا ەكى رەسەيلىك ۇشاق: يل-62 جانە Aن-124 قونعانىن حابارلادى. ۇشاقتا شامامەن ءجۇز رەسەيلىك اسكەري جانە 35 توننا جۇك بولعان.
رەسەيدىڭ سىرتقى ىستەر مينيسترلىگى مەن قورعانىس مينيسترلىگى بۇعان بايلانىستى تۇسىنىكتەمە بەرگەن جوق. بىراق ريا نوۆوستي اگەنتتىگىنە اتى-ءجونىن ايتپاي سۇحبات بەرگەن كاراكاستاعى ديپلوماتتاردىڭ ءبىرى اقپاراتتى راستاعان.
"ەكىجاقتى كەڭەسكە قاتىسۋ ءۇشىن كەلدى" دەگەن اگەنتتىككە اقپارات كوزى. ونىڭ ايتۋىنشا، اسكەريلەر ۇزاق جىل بۇرىن رەسەي مەن ۆەنەسۋەلا اراسىندا جاسالعان كەلىسىم-شارت اياسىندا كەلگەن.
"رەسەيدىڭ [ۆەنەسۋەلامەن] جاساسقان بىرقاتار كەلىسىم-شارتتارى بار، قازىر ولار جۇزەگە اسىپ جاتىر، ولاردىڭ اراسىندا اسكەري-تەحنيكالىق ارىپتەستىك بويىنشا كەلىسىم-شارتتار دا بار" دەگەن ول.
ان-124 جانە يل-62 ۇشاقتارى ۆەنەسۋەلاعا بۇعان دەيىن دە كەلگەن. بىراق ولاردىڭ ناقتى كىم نەمەسە نە اكەلگەنى ايتىلمايدى. Reuters اگەنتتىگى وپپوزيتسيالىق ساياساتكەر حۋان گۋايدو ءوزىن ەلدىڭ ۋاقىتشا پرەزيدەنتىمىن دەپ جاريالاعاننان كەيىن ەل پرەزيدەنتى نيكولاس مادۋرونى قورعاۋ ماقساتىندا رەسەيلىك "ۆاگنەر" جەكە اسكەري توبىنىڭ كەلگەنىن حابارلاعان.
ۆەنەسۋەلادا وپپوزيتسيا جەتەكشىسى حۋان گۋايدو مەن پرەزيدەنت نيكولاس مادۋرو اراسىنداعى تەكەتىرەستىڭ جالعاسىپ كەلە جاتقانىنا شامامەن ءۇش اي بولدى. بيىل قاڭتاردا حۋان گۋايدو ءوزىن ەلدىڭ ۋاقىتشا پرەزيدەنتىمىن دەپ جاريالاپ, مەرزىمىنەن بۇرىن اشىق سايلاۋ وتكىزۋ تۋرالى باستاما كوتەرگەن. گۋايدونى اقش، لاتىن امەريكاسى مەن ەۋروپا وداعى ەلدەرىنىڭ كوبى قولدادى. رەسەي، كۋبا، قىتاي جانە مەكسيكا مادۋرونى ۆەنەسۋەلانىڭ زاڭدى پرەزيدەنتى دەپ سانايدى.
گۋايدو جاقىندا مادۋرو رەجيمىنىڭ اياقتالۋىنا "از قالدى" دەپ مالىمدەگەن. ال مادۋرو ونى "وزىنە قاستاندىق جاساماق بولدى" دەپ ايىپتاعان.
ۆەنەسۋەلادا مادۋرو بيلىگىنە نارازىلىق 2014 جىلدان بەرى جالعاسىپ كەلەدى. مۇنايعا باي ەلدىڭ تۇرعىندارى ازىق-تۇلىك پەن ءدارى-دارمەكتەن تاپشىلىق كورىپ وتىر. 2018 جىلى ەلدەگى ينفلياتسيا كورسەتكىشى ميلليون پايىزدان اسىپ كەتكەن.
"ازاتتىق" راديوسى
