Venesýelanyń aqparat quraldary jeksenbi kúni Karakas áýejaıyna eki reseılik ushaq: Il-62 jáne An-124 qonǵanyn habarlady. Ushaqta shamamen júz reseılik áskerı jáne 35 tonna júk bolǵan.
Reseıdiń syrtqy ister mınıstrligi men qorǵanys mınıstrligi buǵan baılanysty túsinikteme bergen joq. Biraq RIA Novostı agenttigine aty-jónin aıtpaı suhbat bergen Karakastaǵy dıplomattardyń biri aqparatty rastaǵan.
"Ekijaqty keńeske qatysý úshin keldi" degen agenttikke aqparat kózi. Onyń aıtýynsha, áskerıler uzaq jyl buryn Reseı men Venesýela arasynda jasalǵan kelisim-shart aıasynda kelgen.
"Reseıdiń [Venesýelamen] jasasqan birqatar kelisim-sharttary bar, qazir olar júzege asyp jatyr, olardyń arasynda áskerı-tehnıkalyq áriptestik boıynsha kelisim-sharttar da bar" degen ol.
An-124 jáne Il-62 ushaqtary Venesýelaǵa buǵan deıin de kelgen. Biraq olardyń naqty kim nemese ne ákelgeni aıtylmaıdy. Reuters agenttigi oppozıııalyq saıasatker Hýan Gýaıdo ózin eldiń ýaqytsha prezıdentimin dep jarııalaǵannan keıin el prezıdenti Nıkolas Madýrony qorǵaý maqsatynda reseılik "Vagner" jeke áskerı tobynyń kelgenin habarlaǵan.
Venesýelada oppozıııa jetekshisi Hýan Gýaıdo men prezıdent Nıkolas Madýro arasyndaǵy teketirestiń jalǵasyp kele jatqanyna shamamen úsh aı boldy. Bıyl qańtarda Hýan Gýaıdo ózin eldiń ýaqytsha prezıdentimin dep jarııalap, merziminen buryn ashyq saılaý ótkizý týraly bastama kótergen. Gýaıdony AQSh, Latyn Amerıkasy men Eýropa odaǵy elderiniń kóbi qoldady. Reseı, Kýba, Qytaı jáne Meksıka Madýrony Venesýelanyń zańdy prezıdenti dep sanaıdy.
Gýaıdo jaqynda Madýro rejıminiń aıaqtalýyna "az qaldy" dep málimdegen. Al Madýro ony "ózine qastandyq jasamaq boldy" dep aıyptaǵan.
Venesýelada Madýro bıligine narazylyq 2014 jyldan beri jalǵasyp keledi. Munaıǵa baı eldiń turǵyndary azyq-túlik pen dári-dármekten tapshylyq kórip otyr. 2018 jyly eldegi ınflıaııa kórsetkishi mıllıon paıyzdan asyp ketken.
"Azattyq" radıosy
