استانا حالىقارالىق فورۋمى اياسىندا قازاقستان رەسپۋبليكاسىنىڭ دەنساۋلىق ساقتاۋ مينيسترلىگى كاتارداعى Power International Holding ءىرى حولدينگىمەن استانادا مەديتسينالىق حاب سالۋ جوباسىن ىسكە اسىرۋدىڭ نەگىزگى قاعيداتتارى تۋرالى نەگىزدەمەلىك كەلىسىمگە قول قويدى. جوبا «KAZAKH INVEST» ۇك» اق قولداۋىمەن جۇزەگە اسىرىلادى، دەپ حابارلايدى "ادىرنا" ۇلتتىق پورتالى forbes.kz-كە سىلتەمە كورسەتە وتىرىپ.
استاناداعى مەديتسينالىق كوپفۋنكتسيونالدى حاب 300 توسەككە ەسەپتەلگەن جانە ەمحانا، دياگنوستيكالىق جانە وڭالتۋ بولىمدەرىن قامتيدى. جوبانىڭ قۇنى 300 ميلليون دوللاردى قۇرايدى.
كاتارداعى ەكىنشى ءىرى جەكە وتباسىلىق كونگلومەرات Power International Holding جىلجىمايتىن مۇلىك، ەنەرگەتيكا، تەلەكوممۋنيكاتسيالار، قارجى، دەنساۋلىق ساقتاۋ جانە ءبىلىم بەرۋدى قوسا العاندا، ءارتۇرلى سالالاردا جۇمىس ىستەيتىن جەتەكشى اكتيۆتەردى باسقارۋشى بولىپ تابىلادى.
حولدينگتىڭ كاتاردان تىس جەرلەردە ايتارلىقتاي كاپيتالى مەن اكتيۆتەرى بار. كومپانيانىڭ مەديتسينالىق مەكەمەلەردى سالۋ جانە پايدالانۋ تاجىريبەسى بار، ولاردىڭ اراسىندا «The View» 250 توسەك-ورىن جانە 100 000 شارشى مەتر اۋدانى بار دوحا قالاسىنداعى مەديتسينالىق ورتالىعىن اتاپ وتكەن ءجون.
كاتار كومپانيالار توبىنىڭ توراعاسى موۋتاز ءال-حايات قازاقستان رەسپۋبليكاسى دەنساۋلىق ساقتاۋ مينيسترلىگىمەن ىنتىماقتاستىق حولدينگ ءۇشىن ورتالىق ازياداعى جاڭا مۇمكىندىكتەر اشاتىنىن باسا ايتتى.
«KAZAKH INVEST» ۇك» اق Investment Task Force توبىنىڭ بولىمشەسىنىڭ جوبا جەتەكشىسى دينارا يسابەكوۆا ۇلتتىق كومپانيانىڭ Power International Holding كومپانياسىمەن ەكى جىلدان استام كەلىسسوزدەر جۇرگىزگەنىن اتاپ ءوتتى. جوبا دەنساۋلىق ساقتاۋ سالاسىنداعى ەڭ ءىرى جوبالاردىڭ بىرىنە اينالادى جانە ەل تۇرعىندارى ءۇشىن مەديتسينالىق قىزمەتتەردىڭ ساپاسى مەن قولجەتىمدىلىگىن ارتتىرادى.
ايتا كەتۋ كەرەك، جوبانى جۇزەگە اسىرۋ ەكى ەلدىڭ دە ەكونوميكالىق جانە ساۋدا بايلانىستارىن نىعايتۋعا ۇمتىلىسىن راستايدى، سونىمەن قاتار جوعارى تەحنولوگيالىق مەديتسينالىق ينفراقۇرىلىمدى دامىتۋعا ىقپال ەتەدى.
"ادىرنا" ۇلتتىق پورتالى
