ەلوردادا ادام ۇرلاعان الاياقتار توبى ۇستالدى. بۇل تۋرالى انتيكوردىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«استانا قالاسى بويىنشا سىبايلاس جەمقورلىققا قارسى قىزمەت پروكۋراتۋرا تەرگەۋدى انىقتاعاننان كەيىن ا.ە. ءاشىموۆ، ا.ۆ. الەكسەەۆ، ن.ن. شايماردانوۆ جانە ا.ن. باپانوۆتى اشكەرەلەدى. ولار الدىن الا ءسوز بايلاسىپ، وزدەرىن قۇقىق قورعاۋ ورگاندارىنىڭ قىزمەتكەرلەرى رەتىندە تانىستىرعان. ازاماتتى ۇرلاۋمەن قاتار، ەسىرتكى زاتتارىن ساقتاپ جانە قولدانعانى ءۇشىن قىلمىستىق جاۋاپكەرشىلىككە تارتامىز دەپ بوپسالاعان. سونداي-اق 1,4 ملن تەڭگەدەن استام سوما مۇلكىن يەمدەنگەن»،—دەلىنگەن حابارلامادا.
توپتىڭ بارلىق قاتىسۋشىسى سوتتىڭ سانكتسياسىمەن قاماۋعا الىندى.
قازىرگى ۋاقىتتا ولاردىڭ ۇقساس قىلمىستارعا قاتىستىلىعى تەكسەرىلىپ جاتىر.
