اباي وبلىسىندا ءورت وشاقتارىنىڭ باسىم بولىگى وقشاۋلانىپ، جاعدايدىڭ تۇراقتانىپ كەلە جاتقانى ايتىلدى. الاپات الاۋدى اۋىزدىقتاۋ ءساتىنىڭ بەينەدەرەكتەرى جارىق كوردى، دەپ حابارلايدى "ادىرنا" ۇلتتىق پورتالى ءوڭىر اكىمدىگىنە سىلتەمە جاساپ.
اباي وبلىسى اكىمىنىڭ ورىنباسارى ديميتري گاريكوۆ كامىشەنكا ورمانشىلىعى اۋماعىندا ءورت وقشاۋلانعانىن ايتتى. ۋسپەن ورمان القابىندا دا جالىننىڭ سايابىرسىعانى حابارلاندى. سونداي-اق ەلدى مەكەندەرگە تونگەن قاۋىپ-قاتەردىڭ سەيىلگەنىن ءسوز ەتتى.
«بۇگىنگى تاڭدا جاعداي باقىلاۋدا. جالىن شارپىعان اۋماق - 60 مىڭ گا. بىزدە ءۇش ءورت وشاعى بولدى. ەكى وشاقتا ءورت باسىلدى، باتىستا كاشتاك ورمانشىلىعىندا ءتىلسىز جاۋ كۇش بەرمەي تۇر. كامىشەن ورمانشىلىعىنىڭ اۋماعىندا ءورت وقشاۋلاندى، ۋسپەن ورمانشىلىعىندا دا وقشاۋلاۋ جۇمىسى ءجۇرىپ جاتىر. بۇگىنگى تاڭدا ەلدى مەكەندەرگە قاۋىپ جوق. قازىر حالىق ۇيلەرىنە ورالىپ جاتىر، قاۋىپ تولىعىمەن جويىلدى. استانا، قاراعاندى وبلىسى، سەمەي، شقو تجد كۇش-قۇرالدارى، سونداي-اق 200 اسكەري بار. «سەمەي ورمانى» رەزەرۆاتىنىڭ بارلىق دەرلىك كۇش-قۇرالدارى تارتىلدى»، - دەپ اتاپ ءوتتى وبلىس اكىمىنىڭ ورىنباسارى.
قر تجم ورتكە قارسى قىزمەت كوميتەتىنىڭ توراعاسى نۇربولات دەربىسوۆ جاعدايدىڭ بىرتىندەپ تۇراقتانىپ كەلە جاتقانىن راستادى.
«ءورتتى ءسوندىرۋ جۇمىستارى جالعاسىپ جاتىر. اۋا رايى وتە قيىن بولدى، بىراق قازىر ءورت سوندىرۋشىلەردىڭ جۇمىسىنىڭ ارقاسىندا جاعداي بىرتىندەپ تۇراقتانىپ كەلەدى. نەگىزگى وت وشاقتارى عارىش مونيتورينگى ارقىلى تىركەلگەن. باسقا سالالاردان قوسىمشا كۇش-قۇرالداردى تارتۋ جەمىسىن بەردى، جاعداي ءبىزدىڭ باقىلاۋىمىزدا. ەۆاكۋاتسيالانعان ازاماتتار بىرتىندەپ ۇيلەرىنە ورالادى»، - دەپ قورىتىندىلادى نۇربولات دەربىسوۆ.
