Abaı oblysynda órt oshaqtarynyń basym bóligi oqshaýlanyp, jaǵdaıdyń turaqtanyp kele jatqany aıtyldy. Alapat alaýdy aýyzdyqtaý sátiniń beınederekteri jaryq kórdi, dep habarlaıdy "Adyrna" ulttyq portaly óńir ákimdigine silteme jasap.
Abaı oblysy ákiminiń orynbasary Dımıtrıı Garıkov Kamyshenka ormanshylyǵy aýmaǵynda órt oqshaýlanǵanyn aıtty. Ýspen orman alqabynda da jalynnyń saıabyrsyǵany habarlandy. Sondaı-aq eldi mekenderge tóngen qaýip-qaterdiń seıilgenin sóz etti.
«Búgingi tańda jaǵdaı baqylaýda. Jalyn sharpyǵan aýmaq - 60 myń ga. Bizde úsh órt oshaǵy boldy. Eki oshaqta órt basyldy, batysta Kashtak ormanshylyǵynda tilsiz jaý kúsh bermeı tur. Kamyshen ormanshylyǵynyń aýmaǵynda órt oqshaýlandy, Ýspen ormanshylyǵynda da oqshaýlaý jumysy júrip jatyr. Búgingi tańda eldi mekenderge qaýip joq. Qazir halyq úılerine oralyp jatyr, qaýip tolyǵymen joıyldy. Astana, Qaraǵandy oblysy, Semeı, ShQO TJD kúsh-quraldary, sondaı-aq 200 áskerı bar. «Semeı ormany» rezervatynyń barlyq derlik kúsh-quraldary tartyldy», - dep atap ótti oblys ákiminiń orynbasary.
QR TJM órtke qarsy qyzmet komıtetiniń tóraǵasy Nurbolat Derbisov jaǵdaıdyń birtindep turaqtanyp kele jatqanyn rastady.
«Órtti sóndirý jumystary jalǵasyp jatyr. Aýa raıy óte qıyn boldy, biraq qazir órt sóndirýshilerdiń jumysynyń arqasynda jaǵdaı birtindep turaqtanyp keledi. Negizgi ot oshaqtary ǵarysh monıtorıngi arqyly tirkelgen. Basqa salalardan qosymsha kúsh-quraldardy tartý jemisin berdi, jaǵdaı bizdiń baqylaýymyzda. Evakýaııalanǵan azamattar birtindep úılerine oralady», - dep qorytyndylady Nurbolat Derbisov.
