قازاقستان بيلىگى قىرعىزستاننان رەسەيگە زاڭسىز جەتكىزىلمەك بولعان دروندار پارتياسىن تاركىلەدى. بۇل جونىندە قازاقستاندىق Orda.kz سايتى حابارلادى، دەپ جازادى "ادىرنا" ۇلتتىق پورتالى.
باسىلىمنىڭ جازۋىنشا، جالپى قۇنى 16 ملن رۋبل (193 440 دوللار) بولاتىن DJI AgrasT30 ماركالى 14 درون شەكارا ارقىلى قازاقستاننىڭ جامبىل وبلىسىنا تاسىمالدانايىن دەپ جاتقان كەزدە ۇستالعان. درونداردى قىرعىزستاندىق "يمپۋلس-ينۆەست" فيرماسى قازاقستان اۋماعى ارقىلى الىپ وتپەك بولعان، الايدا كومپانيانىڭ مۇنداي تاۋار تۇرلەرىن تاسىمالداۋعا ليتسەنزياسى بولماعان.
رەسمي تۇردە دروندار رەسەيلىك "نوۆا" قۇرىلىس كومپانياسىنا جەتكىزىلۋى ءتيىس بولعان.
"يمپۋلس-ينۆەست" كومپانياسىنا 76 مىڭ تەڭگە (شامامەن 14 مىڭ رۋبل) كولەمىندە ايىپپۇل سالىنعان. جامبىل مەملەكەتتىك مۇلىك جانە جەكەشەلەندىرۋ دەپارتامەنتى تاركىلەنگەن درونداردى ساۋداعا شىعارعان.
ەسكە سالا كەتەيىك، اقش مەملەكەتتىك دەپارتامەنىنىڭ سانكتسيانى ۇيلەستىرۋ باسقارماسىنىڭ ديرەكتورى دجيم و'برايەن قازاقستانعا قىرىن قاراعان ەدى. ول قازاقستاندى رەسەيگە تىيىم سالىنعان تاۋارلاردى جەتكىزىپ وتىرعان ەلدەردىڭ ءبىرى دەپ اتاعان بولاتىن. حالىقارالىق قاتىناس جونىندەگى ەۋروپا كەڭەسى مۇنداي قادامدارجى، رەسەيگە رەەكسپورتى ء"ىرى ماسەلە" دەپ اتاعان-تۇعىن.
"ازاتتىق" راديوسى بۇل جايلى بىلاي جازادى:
"سول سەبەپتى قازاقستان، گرۋزيا، ارمەنياعا بارامىز. كەلىسسوز توپتارى دا تۇركيا مەن ءباا-گە كەتتى. رەسەي جىل باسىندا بىرقاتار نەگىزگى ەلەكتروندى جابدىقتار يمپورتىن سوعىسقا دەيىنگى دەڭگەيگە جەتكىزە العانىن انىقتادىق. مۇنىڭ جالعاسقانىن قالامايمىز. دەگەنمەن رەسەيگە قازىر وسىنداي جابدىقتار جەتپەي وتىر. سەبەبى ونىمدەردىڭ باسىم بولىگى 2022 جىلى كەلمەگەن. بۇعان قوسا، رەسەي ەكونوميكاسى قازىر اسكەري قاجەتتىلىكتەردى دە وتەپ جاتىر جانە ول وسىنداي ەلەكتروندى جابدىقتاردىڭ كوپ پارتياسىنا ءزارۋ. سەبەبى رەسەي جاعى يمپورتتاعانىن ءبىر مەزەتتە جاعىپ جاتىر" دەدى و'برايەن. ونىڭ سوزىنەن ءۇزىندىنى ازاتتىقتىڭ ارميان قىزمەتى كەلتىرەدى.
قازاقستان ۇلتتىق ستاتيستيكا بيۋروسىنىڭ مالىمەتىنشە, 2022 جىلى ەلگە قۇنى 5 ملن دوللار بولاتىن درون يمپورتتالعان. 1,23 ملن دوللار بولاتىن تاۋار رەسەيگە جەتكىزىلگەن.
قازاقستان رەسەيگە دروندار مەن چيپتەر الۋعا كومەكتەسىپ جاتقانىن مامىردىڭ سوڭىندا "ۆاجنىە يستوري" باسىلىمى جازعان. باسىلىم قازاقستاندى سوعىس كەزىندە "دەلدالدىق" جاسادى دەپ كورسەتكەن ەدى.
"ادىرنا" ۇلتتىق پورتالى
