جامبىل وبلىسىنىڭ قىزىلشارۋا اۋىلىندا ناۋرىز مەرەكەسى كەزىندە ساحنا ماڭىندا وتىرعان كورەرمەندەرگە قاراي شاۋىپ كەتكەن جىلقىنىڭ يەسى اكىمشىلىك جاۋاپكەرشىلىككە تارتىلادى، دەپ حابارلايدى "ادىرنا" ۇلتتىق پورتالى.
بۇل تۋرالى وڭىرلىك پوليتسيا دەپارتامەنتى مالىمدەدى.
"22 ناۋرىز كۇنى الەۋمەتتىك جەلىلەردە بەلگىسىز سەبەپتەرمەن اشۋلانعان جىلقىنىڭ شاباندوزىن جەرگە ءتۇسىرىپ، ادامدارعا قاراي شاپقانى تۇسىرىلگەن ۆيدەو جاريالاندى. بۇل وقيعا پوليتسيادا تىركەلدى", – دەلىنگەن حابارلامادا.
ۆەدومستۆونىڭ مالىمەتىنشە، وقيعا كەزىندە ازاماتتار اۋىر جاراقات الماعان جانە مەديتسينالىق كومەككە مۇقتاج بولماعان.
"پوليتسيا قىزمەتكەرلەرى تەكسەرىس جۇرگىزىپ، جىلقىنىڭ يەسىن انىقتادى. ول اكىمشىلىك جاۋاپكەرشىلىككە تارتىلادى", – دەپ حابارلادى دەپارتامەنتتىڭ ءباسپاسوز قىزمەتى.
ەسكە سالايىق، 22 ناۋرىز كۇنى جامبىل وبلىسىنىڭ قىزىلشارۋا اۋىلىندا ناۋرىز مەرەكەسى كەزىندە جىلقى ۇركىپ، ساحنا ماڭىندا وتىرعان كورەرمەندەرگە قاراي شاۋىپ كەتكەن بولاتىن. جەرگىلىكتى بيلىك بۇل وقيعا مەرەكەنىڭ جالعاسۋىنا اسەر ەتپەگەنىن جانە زارداپ شەككەندەر جوق ەكەنىن مالىمدەدى.
