ءورت شارپىعان اۋماق 60 مىڭ گەكتاردان استى. ۇكىمەتتە پرەمەر-مينيستر ءاليحان سمايىلوۆتىڭ توراعالىعىمەن وتكەن كەڭەستە اباي وبلىسىنداعى ءىرى تابيعي ورتپەن كۇرەسۋ شارالارى تالقىلاندى، دەپ حابارلايدى "ادىرنا" ۇلتتىق پورتالى ۇكىمەتتىڭ Telegram پاراقشاسىنا سىلتەمە جاساپ.
قازىرگى كەزدە ءورتتىڭ جالپى اۋدانى 60 مىڭ گا-دان اسادى. تجم دەرەكتەرىنە ساي، الپاۋىت ءورت تاليتسا، كاشتاك، بارىشەۆكا، ۋسپەنكا، پودنەبەسنوە جانە كامىشەنكا ەلدى مەكەندەرىنە قاراي ءۇش باعىتتا تارالىپ جاتىر.
ونى سوندىرۋگە تجم، قورعانىس مينيسترلىگى، ءىىم، ەترم جانە جەرگىلىكتى اتقارۋشى ورگانداردىڭ كۇش-قۇرالدارى جۇمىلدىرىلعانى ايتىلدى.
800-گە مامان ادام، 190 تەحنيكا جانە 8 تىكۇشاق تارتىلعانى حابارلاندى.
سونىمنەن قاتار، وتىرىستا الپاۋىت ءورت شارپىعان اۋداندى قالىڭ ءتۇتىن باسقانىمەن، ءتىلسىز جاۋدىڭ لاپىلداپ جانىپ جاتپاعانى باياندالدى. جالىننىڭ باسىلۋىنا اۋا رايى، تۇندە جانە تاڭەرتەڭ سىركىرەپ جاۋعان جاڭبىر اسەر ەتكەن.
ەلدى مەكەندەرگە تونگەن قاۋىپ-قاتەردىڭ سەيىلگەنى حابارلاندى.
پرەمەر-مينيستر ەڭبەك جانە حالىقتى الەۋمەتتىك قورعاۋ مينيسترلىگى، دەنساۋلىق ساقتاۋ جانە ىشكى ىستەر مينيسترلىگى وكىلدەرىنە بىرقاتار تاپسىرمالار بەردى.
"ادىرنا" ۇلتتىق پورتالى
