قازاق ادەبيەتىنىڭ كورنەكتى وكىلى، جازۋشى جانە زەرتتەۋشى مۇحتار ماعاۋيننىڭ توپىراعى تۋعان جەرىنە جەتتى، دەپ حابارلايدى "ادىرنا" ۇلتتىق پورتالى.
قالامگەردىڭ ۇلى ەدىگە ماعاۋين اقش-تاعى زيرات باسىنان الىنعان توپىراقتى جازۋشىنىڭ اتا-باباسى جەرلەنگەن كوپبەيىت قورىمىنا اكەلدى. بۇل قورىم اباي وبلىسىنىڭ شۇبارتاۋ وڭىرىندە ورنالاسقان.
«اكەمىزدىڭ جاتقان جەرىنەن توپىراق الىپ كەلىپ، ونىڭ اكەسى ماعاۋيا اتامىزدىڭ، ۇلكەن اتاسى قۇرىمباي اتامىزدىڭ جانە اكەمىزدى تاربيەلەگەن ورىنباسار شەشەمىزدىڭ قابىرلەرىنە قويدىق. سول سياقتى تۋعان جەردىڭ توپىراعى مەن جۋسانىن دا اكەمىزدىڭ ۆاشينگتونداعى قابىرىنە اپارماقپىز»، - دەدى ەدىگە ماعاۋين.
جازۋشىنىڭ قولجازبالارى مەن جەكە مۇراعاتى قازىر ۆاشينگتونداعى وتباسىلىق ۇيدە ساقتاۋلى. ءومىرىنىڭ سوڭعى جىلدارىندا دايىنداعان 27 تومدىق شىعارمالار جيناعىنىڭ 26 تومى جارىق كورگەن، قالعان ەڭبەكتەرى مەن كۇندەلىكتەرى بولاشاقتا جاريالانباق. ۇلىنىڭ ايتۋىنشا، الداعى ۋاقىتتا اكەسىنىڭ تۇرعان ءۇيىن مۇحتار ماعاۋين ورتالىعى مەن مۇراجايىنا اينالدىرۋ جوسپاردا بار.
