ۇكىمەتتىڭ ءباسپاسوز قىزمەتىنىڭ مالىمەتىنشە، ارناۋلى مەملەكەتتىك قوردان اباي وبلىسىندا سۋمەن جابدىقتاۋ جەلىلەرىن سالۋعا 10 ملرد تەڭگەدەن استام قارجى ءبولىندى، دەپ حابارلايدى "ادىرنا" ۇلتتىق پورتالى.
مەملەكەت باسشىسىنىڭ تاپسىرماسىنا سايكەس، ەلگە قايتارىلعان زاڭسىز يەمدەنىلگەن اكتيۆتەر قاراجاتى الەۋمەتتىك ماڭىزدى ينفراقۇرىلىمداردى سالۋعا باعىتتالۋدا. وڭىردە جالپى 21 جوبا ىسكە اسىرىلىپ جاتىر. ونىڭ جەتەۋى سەمەي قالاسىندا ورنالاسقان.
سۋ جەلىلەرىن تارتۋ جۇمىستارى اۋىلدىق اۋماقتاردى دا قامتيدى. اتاپ ايتقاندا، بورودۋليحا، ءۇرجار جانە اباي اۋداندارىندا جاڭا سۋمەن جابدىقتاۋ جەلىلەرى جۇرگىزىلمەك.
بۇل جوبالار حالىقتىڭ ءومىر ءسۇرۋ ساپاسىن ارتتىرۋعا، كوممۋنالدىق قىزمەتتەرگە قولجەتىمدىلىكتى كەڭەيتۋگە جانە ينفراقۇرىلىمدى جاڭعىرتۋعا باعىتتالعان. نىسانداردى بيىل پايدالانۋعا بەرۋ جوسپارلانىپ وتىر.
ونەركاسىپ جانە قۇرىلىس مينيسترلىگىنىڭ مالىمەتىنشە، قازىر سەمەي قالاسىندا سۋمەن قامتۋ دەڭگەيى – 95,5%، ال اباي وبلىسىنىڭ اۋىلدارىندا 95% قۇرايدى.
