قازاقستان شەنەۋنىكتەرى 2019 جىلدان بەرى قانشا ملرد. جەپ قويدى؟

2045
Adyrna.kz Telegram

قازاقستاننىڭ باس پروكۋرورى بەرىك اسىلوۆ Twitter-دە 2019 جىلدان بەرى اياقتالعان سىبايلاس جەمقورلىق ىستەرى بويىنشا كەلتىرىلگەن شىعىن كولەمىن اتادى، - دەپ حابارلايدى "ادىرنا" ۇلتتىق پورتالى. 

«مەملەكەت باسشىسى جولداۋدا جەمقورلىققا جول بەرگەن شەنەۋنىكتەردەن زاڭسىز جولمەن الىنعان قاراجاتقا مەكتەپ سالۋ تەتىگىن ازىرلەۋدى تاپسىردى.
2019 جىلدان بەرى اياقتالعان سىبايلاس جەمقورلىق قىلمىستىق ىستەرى بويىنشا كەلتىرىلگەن شىعىن كولەمى 29 ميلليارد تەڭگەدەن استى.

ول پروكۋرورلارعا زاڭسىز جولمەن الىنعان قاراجات پەن مۇلىكتى ءوندىرىپ الۋدى قاداعالاۋدى كۇشەيتۋدى تاپسىردى. ۇكىمەتپەن بىرلەسە وتىرىپ، ەلباسىنىڭ باستاماسىن جۇزەگە اسىرۋعا كىرىسەمىز»، - دەپ جازدى باس پروكۋرور.

ەسكە سالايىق، 1 قىركۇيەكتە پرەزيدەنت قاسىم-جومارت توقاەۆ قازاقستان حالقىنا جولداۋىندا جەمقور شەنەۋنىكتەردەن تاركىلەنگەن اقشا قازاقستاندا مەكتەپ سالۋعا جۇمسالاتىنىن ايتقان بولاتىن.

سونداي-اق باس پروكۋرور مەملەكەت باسشىسىنىڭ تاپسىرماسى بويىنشا كەلەسى جىلى 100 مىڭ جاس قوسىمشا جۇمىسپەن قامتىلاتىنىن اتاپ ءوتتى. ولارعا جەڭىلدەتىلگەن نەسيە دە قولداۋ كورسەتىلەدى.

"بۇل قادام ولاردىڭ الەۋمەتتىك-ەكونوميكالىق دامۋىنا وڭ اسەرىن تيگىزەدى. ستاتيستيكالىق مالىمەتتەرگە سۇيەنسەك، قىلمىستىڭ 90 پايىزىن جۇمىسسىزدار جاسايدى، سوندىقتان بۇل بۇيرىقتىڭ ورىندالۋى ەلدەگى قىلمىستىق احۋالدى جاقسارتاتىنى ءسوزسىز", - دەدى اسىلوۆ.

"ادىرنا" ۇلتتىق پورتالى

پىكىرلەر