پرەزيدەنتتىككە كانديدات رەتىندە ۇسىنىلعان نۇرجان التاەۆتىڭ قۇجاتتارى بۇرمالانۋ فاكتىسىنە تەكسەرىلىپ جاتىر. بۇل تۋرالى ورتالىق سايلاۋ كوميسسياسىنىڭ رەسمي سايتى مالىمدەدى، دەپ حابارلايدى “ادىرنا” ۇلتتىق پورتالى.
«2022 جىلعى 7 قازاندا قازاقستان رەسپۋبليكاسىنىڭ ورتالىق سايلاۋ كوميسسياسىنا «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 54 جانە 55-باپتارىنا، سونداي-اق «قازاقستان رەسپۋبليكاسى پرەزيدەنتىنىڭ 2022 جىلعى 20 قاراشاعا تاعايىندالعان كەزەكتەن تىس سايلاۋى بويىنشا سايلاۋ قۇجاتتارىنىڭ نىساندارىن بەلگىلەۋ تۋرالى» قازاقستان رەسپۋبليكاسى ورتالىق سايلاۋ كوميسسياسىنىڭ 2022 جىلعى 23 قىركۇيەكتەگى № 67/545 قاۋلىسىنا سايكەس نۇرجان باۋىرجانۇلى التاەۆتىڭ «مۇقالماس» رەسپۋبليكالىق قوعامدىق بىرلەستىگىنەن قازاقستان رەسپۋبليكاسىنىڭ پرەزيدەنتتىگىنە كانديدات بولىپ ۇسىنىلعانى تۋرالى كەلەسى قۇجاتتارى ۇسىنىلدى:
1. «مۇقالماس» رەسپۋبليكالىق قوعامدىق بىرلەستىگىنىڭ جوعارى ورگانى وتىرىسىنىڭ قازاقستان رەسپۋبليكاسىنىڭ پرەزيدەنتتىگىنە ۇسىنۋ تۋرالى حاتتاماسىنان ءۇزىندى كوشىرمەسى;
2. ن.ب. التاەۆتىڭ قازاقستان رەسپۋبليكاسىنىڭ پرەزيدەنتتىگىنە كانديدات بولۋعا كەلىسىمى تۋرالى ومىرباياندىق دەرەكتەرى قوسا بەرىلگەن ءوتىنىشى;
3. قازاقستان رەسپۋبليكاسى ورتالىق سايلاۋ كوميسسياسىنىڭ شوتىنا سايلاۋ جارناسىنىڭ ەنگىزىلگەنىن كۋالاندىراتىن قۇجات;
4. جەكە باسىن كۋالاندىراتىن قۇجاتتىڭ كوشىرمەسى;
5. جوعارى ءبىلىمى تۋرالى ديپلومنىڭ كوشىرمەسى.
سونداي-اق، ورتسايلاۋكومعا ا.ج. 7 قازاندا «مۇقالماس» رقب فيليالدارىنىڭ بىرقاتار باسشىلارىنان «مۇقالماس» رەسپۋبليكالىق قوعامدىق بىرلەستىگىنىڭ جوعارى ورگانى وتىرىسىنىڭ قازاقستان رەسپۋبليكاسىنىڭ پرەزيدەنتتىگىنە ن.ب. التاەۆتى ۇسىنۋ تۋرالى حاتتاماسىنىڭ بۇرمالانعانى تۋرالى ءوتىنىش كەلىپ تۇسكەنىن حابارلايمىز. قازىرگى ۋاقىتتا وسى فاكت بويىنشا قۇزىرەتتى ورگاندار تەكسەرۋ جۇرگىزۋدە»، - دەلىنگەن حابارلامادا.
“ادىرنا” ۇلتتىق پورتالى
