ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ بار مۇلكى مەملەكەت مەنشىگىنە بەرىلەدى. بۇل تۋرالى انتيكوردىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
سىبايلاس جەمقورىققا قارسى ءىس-قيمىل اگەنتتىگى تەرگەۋ بارىسىندا زاڭسىز شىعارىلعان اكتيۆتەردى، سونداي-اق قىلمىستىق قاراجاتقا ساتىپ الىنعان مۇلىكتى قايتارۋ بويىنشا شارالار قابىلدانعانىن مالىمدەدى.
«ساتىبالدىۇلىنا زالالدى وتەۋ ماقساتىندا بيزنەس ورتالىقتار، اكىمشىلىك عيماراتتار، كوممەرتسيالىق ءۇي-جايلار، ۇيلەر، پاتەرلەر، اياقتالماعان قۇرىلىس وبەكتىلەرى، جەر ۋچاسكەلەرى، ەكسكليۋزيۆتى زەرگەرلىك بۇيىمدار، ليۋكس اۆتوماشينالار مەن اقشالاي قاراجات مەملەكەتكە بەرىلەدى.
ولاردىڭ قاتارىنا 2021 جىلدىڭ قاراشا ايىندا ساتىبالدىۇلىمەن بايلانىستى كاسىپورىن ساتىپ العان «Double Tree by Hilton Almaty» قوناق ءۇيى كىرەدى.
قازىرگى ۋاقىتتا وسى وبەكتىنى مەملەكەت مەنشىگىنە قايتارۋ اياقتالۋدا»،—دەدى باسقارما.
بۇعان دەيىن قايرات ساتىبالدىنىڭ قاماۋدا وتىرعان كەزىندە 6 ملرد تەڭگەگە الماتىدان قوناق ءۇي ساتىپ العانىن جازعان ەدىك. بۇل ماسەلەنى ءماجىلىس دەپۋتاتى ماقسات تولىقباي كوتەرىپ، شاعىمدانۋشىلاردىڭ ارىزىن انتيكور مەن باس پروكۋرورعا جولداعانىن ايتتى.
ەسكە سالايىق، قايرات ساتىبالدى 2022 جىلدىڭ 13 ناۋرىزىندا ۇستالىپ، ۋاقىتشا ۇستاۋ يزولياتورىنا قامالعان بولاتىن. ول «قازاقتەلەكوم» اق مەن «كولىكتىك سەرۆيس ورتالىعى» اق قاراجاتىن اسا ءىرى كولەمدە ۇرلاۋ فاكتىلەرى بويىنشا ايىپتالىپ، 6 جىلعا سوتتالدى.
