نۇرسۇلتان نازارباەۆتىڭ نەمەرە ءىنىسى قايرات ساتىبالدىنىڭ قاي كولونيادا جازاسىن وتەيتىنى بەلگىلى بولدى. بۇل تۋرالى YEDILOV ONLINE telegram-ارناسى جاريالادى، دەپ حابارلايدى “ادىرنا” ۇلتتىق پورتالى.
“قايرات ساتىبالدىۇلى شقو-داعى № 22 كولونياعا اۋىستىرىلدى. بۇل ارنايى جانە قۇقىق قورعاۋ ورگاندارىنىڭ بۇرىنعى قىزمەتكەرلەرىنە ارنالعان كولونيا. دەرەككوزدەر قايرات ساتىبالدىۇلىنىڭ وسى كولونياعا جەتكىزىلگەنىن، سوت ۇكىمىمەن 6 جىل جازاسىن وتەيتىنىن حابارلادى”، – دەلىنگەن جازبادا.
استانا سوتى قايرات ساتىبالدىۇلىنىڭ تەرگەۋ يزولياتورىنان بوساتىلعانىن راستادى.
"قايرات ساتىبالدىۇلىنا قاتىستى ۇكىم 20 قازاندا زاڭدى كۇشىنە ەندى. ول شىعىس قازاقستان وبلىسى بويىنشا قىلمىستىق-اتقارۋ جۇيەسى دەپارتامەنتىنىڭ №22 مەكەمەسىندە جازاسىن وتەپ جاتىر", – دەلىنگەن استانا قالالىق سوتىنىڭ ءباسپاسوز قىزمەتىنىڭ حابارلاماسىندا.
ەسكە سالايىق، 26 قىركۇيەك كۇنى استانادا بايقوڭىر اۋدانىنىڭ №2 سوتىنىڭ سۋدياسى قايرات ساتىبالدىعا قاتىستى سوڭعى ۇكىمدى وقىدى. سوت ساتىبالدىنى 6 جىلعا باس بوستاندىعىنان ايىرعان بولاتىن.
سوت ۇكىمىن سۋديا نۇرلان باياحمەتوۆ وقىدى. ساتىبالدىنى سىبايلاس جەمقورلىققا قارسى اگەنتتىك قىزمەتكەرلەرى “قازاقتەلەكوم” اق-نىڭ اسا ءىرى كولەمدەگى قارجىسىن جىمقىرۋ جانە قىزمەتىن اسىرا پايدالانۋ فاكتىسى بويىنشا ۇستاعان.
بۇعان دەيىنگى سوت وتىرىسىندا قايرات ساتىبالدى ميللياردتاعان دوللاردى جىمقىرعانىن تولىق مويىنداپ، جاساعان ىسىنە وكىنەتىنىن ايتقان.
ول 6 جىلعا باس بوستاندىعىنان ايىرۋ جازاسىن ورتاشا رەجيمدەگى تۇزەۋ كولونياسىندا وتەۋ جازاسىنا كەسىلدى. سونداي-اق ول 10 جىل بويى مەملەكەتتىك قىزمەتتە جۇمىس ىستەي المايدى.
پروكۋرور جانگەلدى ەسەباەۆ ساتىبالدىنى التى جىلعا باس بوستاندىعىنان ايىرۋدى سۇرادى. سونداي-اق ول ايىپتالۋشىنى "قۇرمەت", "پاراسات" وردەندەرىنەن ايىرۋدى دا تالاپ ەتكەن.
2022 جىلعى 13 ناۋرىزدان باستاپ ۇكiم زاڭدى كۇشiنە ەنگەنگە دەيiن قاماۋعا الىنعان كۇن جازانى وتەۋدiڭ 1,5 تاۋلiگi بولىپ ەسەپتەلەدi.
سونىمەن قاتار، مارات مۇحامبەتجانۇلى مەن عايني بەكەتوۆ التى جىلعا شارتتى تۇردە باس بوستاندىعىنان ايىرۋ جازاسىنا كەسىلدى.
ال شىڭعىس قوڭىرباەۆ پەن لەونيد مۋراۆەۆكە 2,5 جىلعا شارتتى تۇردە باس بوستاندىعىنان ايىرۋ جازاسى تاعايىندالدى.
ودان بولەك، ساتىبالدى مەن باسقا دا تۇلعالارعا قاتىستى سالىقتى جانە بيۋدجەتكە تولەنەتىن باسقا دا مىندەتتى تولەمدەردى تولەۋدەن جالتارۋ، سونداي-اق قىلمىستىق جولمەن الىنعان اقشانى جانە وزگە دە مۇلىكتى زاڭداستىرۋ فاكتىلەرى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. سول سەبەپتى قايرات ساتىبالدىدان سوت الدىندا الداعى ۋاقىتتا دا جاۋاپ الىنادى.
