ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدى قاماۋدا وتىرعان كەزىندە 6 ملرد تەڭگەگە الماتىدان قوناق ءۇي ساتىپ العان. بۇل تۋرالى ءماجىلىس دەپۋتاتى، جۋرناليست ماقسات تولىقباي ايتتى، دەپ حابارلايدى «ادىرنا» ءتىلشىسى.
ول Hilton قوناق ءۇيىنىڭ 160 قىزمەتكەرىنىڭ ارىز-شاعىمىن تىڭداپ قايتقانىن اتاپ ءوتتى. ايتۋىنشا، بۇل قوناق ءۇيدىڭ يەسى شولپان كارانەەۆا عيماراتتى قايرات ساتىبالدىنىڭ رەيدەرلىك جولمەن تارتىپ العانىن 2020 جىلى-اق اشىق ايتىپ، تالاي بۇقارالىق اقپارات قۇرالىنا سۇحبات بەرگەن، اپپەلياتسيالىق سوتقا شاعىمدانعان. الايدا ودان ەش ناتيجە شىقپاعان.
«وسىدان ءتورت جىل بۇرىن (2019 ج) فرانچايزينگ كەلىسىمىمەن Hilton قوناق ءۇيىن سالعان. قۇرىلىستى اياقتاۋ ءۇشىن «Capital Bank Kazakhstan» اق-عا قوناق ءۇيدى كەپىلگە قويىپ 4 ملرد 200 ملن تەڭگە سوماسىندا قارىز العان. كوروناۆيرۋس پاندەمياسى باستالعان 2020 جىلى Hilton قوناق ءۇيى قىزمەتىن ۋاقىتشا توقتاتقان.
سول كەزدە پرەزيدەنت كاسىپكەرلەردى تۇرالاپ قالماۋ ءۇشىن بانكتەرگە تولەمدەردى ۋاقىتشا توقتاتۋعا بۇيرىق بەرگەن. ال «Capital Bank Kazakhstan» اق پرەزيدەنت بۇيرىعىن پىسقىرماعان. بانك تاراپى وتىنىشكە جاۋاپ بەرمەي، قوناق ءۇيدى «زاڭگەر» كوللەكتورلىق اگەنتتىگىنە بەرەدى. ال «زاڭگەر» قوناق ءۇيدىڭ نارىقتاعى قۇنى 9,5 ملرد تەڭگەدەن اسسا دا، ونى بار بولعانى 5,1 ملرد تەڭگەگە باعالاپ، «بايدالا» جشس-عا ساتىپ جىبەرگەن»،— دەيدى «ابلي قۇرىلىس»كومپانياسىنىڭ قۇرىلتايشىسى.
ماقسات تولىقباي بۇل ىستە زاڭسىزدىقتىڭ كوپ ەكەنىن جەتكىزدى.
«قايرات ساتىبالدى اباقتىعا قامالىپ، دۇنيە-مۇلكى تاركىلەنگەن كەزدە ءبىزدىڭ قۇزىرلى ورگاندار DoubleTree by Hilton قوناق ءۇيىن دە قايراتتىڭ تاركىلەنگەن مۇلىكتەرىنىڭ قاتارىنا قوسىپ قويعان ەكەن. «ابلي قۇرىلىس» كومپانياسى «ءبىز «بايدالا» جشس-مەن سوتتاسىپ جاتىرمىز، بۇل قالاي قايرات ساتىبالدىعا ءوتىپ كەتەدى، ءىس ءالى قارالىپ جاتىر عوي؟!» دەپ ارىز تۇسىرگەننەن كەيىن قايرات پەن «بايدالا» اراسىندا تەز ارادا كەلىسىمشارت جاسالادى. تۇرمەدە! ول جەرگە نوتاريۋستى قالاي كىرگىزىپ ءجۇر، تۇرمەدە وتىرعان قايراتتىڭ قالتاسىندا 6 ملرد تەڭگە قايدان ءجۇر؟! بۇل جەردە دە زاڭسىزدىق كوپ»،—دەدى ول.
دەپۋتات شاعىمدانۋشىلاردىڭ ارىزىن انتيكور مەن باس پروكۋرورعا جولداعانىن دا اتاپ ءوتتى.
«ءبىز شىن مانىندە ادىلەتتى قازاقستان قۇرعىمىز كەلسە، وسىنداي زاڭدى بيزنەسىن الدەكىمدەر كوپە-كورنەۋ تارتىپ العان تۇلعالاردىڭ دا زارى مەن مۇڭىنا قۇلاق ءتۇرىپ، كوڭىل ءبولۋىمىز كەرەك شىعار. جابىرلەنۋشى تاراپ قۇزىرلى ورگانداردىڭ ءىستى ءادىل قاراۋىن سۇرايدى»،—دەپ تۇيىندەدى ماقسات تولىقباي.
ايتا كەتەيىك، قايرات ساتىبالدى 2022 جىلدىڭ 13 ناۋرىزىندا ۇستالىپ، ۋاقىتشا ۇستاۋ يزولياتورىنا قامالعان بولاتىن. ول «قازاقتەلەكوم» اق مەن «كولىكتىك سەرۆيس ورتالىعى» اق قاراجاتىن اسا ءىرى كولەمدە ۇرلاۋ فاكتىلەرى بويىنشا ايىپتالىپ، 6 جىلعا سوتتالدى.
