اقش پرەزيدەنتى دونالد ترامپ اقش پەن وڭتۇستىك كورەيانىڭ بىرلەسكەن اسكەري جاتتىعۋلارىنىڭ اۋقىمىن قىسقارتۋدى تاپسىردى، دەپ حابارلايدى "ادىرنا" ۇلتتىق پورتالى.
ونىڭ ايتۋىنشا، بۇل شەشىم سولتۇستىك كورەيا باسشىسى كيم چەن ىنمەن قارىم-قاتىناستى بۇزباۋ ءۇشىن قابىلدانعان. ترامپ بۇل تۋرالى ءوزىنىڭ Truth Social الەۋمەتتىك جەلىسىندەگى پاراقشاسىندا جازدى.
اقش پرەزيدەنتى پەنتاگون باسشىسى پيت حەگسەتكە وڭتۇستىك كورەيامەن بىرلەسكەن اسكەري جاتتىعۋلار باعدارلاماسىن قىسقارتۋدى تاپسىرعانىن ايتتى.
«كيم چەن ىنمەن وتە جاقسى قارىم-قاتىناسىم بار ەكەنىن ەسكەرسەك، اقش-تىڭ وڭتۇستىك كورەيامەن بىرلەسكەن اسكەري جاتتىعۋلارعا قاتىسۋعا كەلىسكەنىنە كوڭىلىم تولمايدى»، – دەپ جازدى ترامپ.
سولتۇستىك كورەيانىڭ ىقتيمال قاۋىپ-قاتەرىنە قارسى دايىندىقتى كۇشەيتۋگە باعىتتالعان Ulchi Freedom Shield اسكەري جاتتىعۋلارى 17 تامىزدا باستالدى. ترامپ جاتتىعۋلاردى تولىق توقتاتۋعا تىم كەش ەكەنىن اتاپ ءوتىپ، ولاردىڭ كولەمىن «ايتارلىقتاي قىسقارتۋدى» تاپسىرعانىن ايتتى.
اقش پرەزيدەنتى بىرلەسكەن اسكەري جاتتىعۋلاردىڭ شىعىنىنا دا نازار اۋداردى. ونىڭ پىكىرىنشە، مۇنداي مانەۆرلەر قوماقتى قاراجاتتى تالاپ ەتەدى جانە شىعىنداردىڭ ەداۋىر بولىگىن اقش كوتەرەدى. سونىمەن قاتار ترامپ جاتتىعۋلار سولتۇستىك كورەياعا قاجەتسىز ءارى دۇشپاندىق بەلگى بەرەدى دەپ سانايدى.
ترامپ وڭتۇستىك كورەيانىڭ يران ماسەلەسىنە قاتىستى ۇستانىمىنا دا توقتالدى. ونىڭ ايتۋىنشا، ول سەۋلدەن يراندى يادرولىق قارۋدان ارىلتۋ جونىندەگى اقش باستاماسىنا قوسىلۋعا نيەتى بار-جوعىن سۇراعان. الايدا وڭتۇستىك كورەيا تاراپى بۇل ۇسىنىستان باس تارتقان. اقش پەن وڭتۇستىك كورەيا سولتۇستىك كورەيا تاراپىنان تونەتىن قاۋىپكە بايلانىستى تۇراقتى تۇردە بىرلەسكەن اسكەري جاتتىعۋلار وتكىزىپ كەلەدى. بيىلعى مانەۆرلەرگە مىڭداعان اسكەري قىزمەتكەر مەن اسكەري تەحنيكا قاتىسادى. جاتتىعۋلار بارىسىندا دروندارعا قارسى ءىس-قيمىل، GPS سيگنالدارى ىستەن شىققان كەزدەگى ارەكەتتەر جانە كيبەرشابۋىلدارعا تويتارىس بەرۋ سەكىلدى باعىتتار پىسىقتالادى.
ال سولتۇستىك كورەيا اقش پەن وڭتۇستىك كورەيانىڭ بىرلەسكەن اسكەري جاتتىعۋلارىن بۇعان دەيىن دە بىرنەشە رەت سىناعان. كحدر سىرتقى ىستەر مينيسترلىگى بۇل مانەۆرلەردى «باسقىنشىلىق سوعىستىڭ رەپەتيتسياسى» دەپ اتاپ، ولاردى ەل قاۋىپسىزدىگىنە تونگەن ەلەۋلى قاتەر رەتىندە باعالاعان.
