قىتاي باسشىسى سي تسزينپين تايۆانعا قاتىستى شيەلەنىستىڭ كۇشەيۋىنە بايلانىستى اقش پرەزيدەنتى دجو بايدەنگە ەسكەرتۋ جاسادى، - دەپ حابارلايدى "ادىرنا" ءتىلشىسى Reuters اگەنتتىگىنە سىلتەمە جاساپ.
مەملەكەت باسشىلارىنىڭ تەلەفون ارقىلى سويلەسۋىندە قىتاي باسشىسى ۆاشينگتوننىڭ «ءبىر قىتاي ءپرينتسيپىن» ۇستانۋى كەرەكتىگىن ايتىپ، قىتايدىڭ تايۆان تاۋەلسىزدىگى مەن سىرتتان ارالاسۋىنا ءۇزىلدى-كەسىلدى قارسى ەكەنىن باسا ايتتى. ول سونىمەن قاتار قىتاي حالقىنىڭ تايۆان ماسەلەسىندە «قىتايدىڭ ۇلتتىق ەگەمەندىگى مەن اۋماقتىق تۇتاستىعىن باتىل قورعاۋعا» بەل بايلاعانىن باسا ايتىپ، ارالدىڭ جاريالانعان تاۋەلسىزدىگىن مويىندامايتىنىن قوستى.
"وتپەن ويناعان ادام كۇيەدى. ءبىز اقش بۇعان انىق قارايدى دەپ ۇمىتتەنەمىز", - دەدى سي تەلەفون ارقىلى سويلەسكەن اڭگىمەسىندە.
بايدەن سي تسزينپينگە اقش-تىڭ تايۆانعا قاتىستى ساياساتى وزگەرمەگەنىن جانە ۆاشينگتون ستاتۋس-كۆونى وزگەرتۋگە نەمەسە تايۆان بۇعازىنداعى بەيبىتشىلىك پەن تۇراقتىلىققا نۇقسان كەلتىرۋگە باعىتتالعان بىرجاقتى ارەكەتتەرگە ءۇزىلدى-كەسىلدى قارسى ەكەنىن ايتتى.
اڭگىمەلەسۋدەن كەيىن تايۆان بايدەنگە كورسەتكەن قولداۋى ءۇشىن العىس ايتتى جانە اقش-پەن قاۋىپسىزدىك سالاسىنداعى سەرىكتەستىكتى تەرەڭدەتۋدى جالعاستىراتىنىن ايتتى، دەلىنگەن سىرتقى ىستەر مينيسترلىگىنىڭ مالىمدەمەسىندە.
اق ءۇي كوپتەن جوسپارلانعان قوڭىراۋ اكىمشىلىكتىڭ قىتايمەن بايلانىس جەلىلەرىن تەرەڭدەتۋگە جانە «قايشىلىقتاردى جاۋاپكەرشىلىكپەن باسقارۋعا» باعىتتالعان كۇش-جىگەرىنىڭ ءبىر بولىگى ەكەنىن ايتتى.
"ادىرنا" ۇلتتىق پورتالى
