Qytaı Qorǵanys mınıstri Lı Shanfý 4 maýsymda Sıngapýrde ótken Shangrı-La qaýipsizdik forýmynda halyqaralyq aýdıtorııa aldynda AQSh, Taıvan, Ýkraına týraly aıtyp, AQSh-ty synady. Bul týraly DW basylymy jarııalady, dep habarlaıdy “Adyrna” ulttyq portaly.
Ol Qytaı men AQSh júıeleriniń ártúrligine jáne basqa da kóptegen aspektilerde erekshelenetinine toqtaldy. Sondaı-aq, Qytaı men AQSh arsynda qaqtyǵys bolsa álem úshin tózgisiz apat oryn alatynyn alǵa tartty.
Biraq bul ekijaqty baılanystardy damytý jáne yntymaqtastyqty tereńdetý úshin ortaq til tabýǵa kedergi bolmaýy kerek. Qytaı men AQSh arasynda kúrdeli qaqtyǵys nemese qarama-qaıshylyq bolsa bul álem úshin tózgisiz apatqa aınalady, - dedi ol.
Lı Qytaıdyń AQSh-qa qarsy shaǵymdary bar ekenin de aıta ketti.
Uly el óz múddesi úshin bloktyq qaqtyǵysty týdyrmaýy kerek, soǵan sáıkes áreket etýi kerek,- dedi Qytaıdyń Qorǵanys mınıstri.
Sonymen qatar, Qytaı mınıstri Taıvan týraly da aıta ketti. Ol Qytaı Taıvandy baqylaýǵa alýdy "ulttyq jańǵyrý" máselesi retinde qarastyratynyn alǵa tartty.
Taıvan - Qytaılyq Taıvan, al Taıvan máselesin qalaı sheshý Qytaıdyń óz erki. Eger Taıvandy Qytaıdan bireý bólip almaq bolsa, Qytaı áskeri bir sekýndqa da tartynbaıdy, - dedi ol.
Lı Ýkraınadaǵy soǵys týraly da sóz qozǵady. Qytaıdyń qorǵanys mınıstri Beıjiń beıbit kelissózderdi jeńildetý úshin bar kúsh-jigerin salyp jatqanyn jáne soǵys qımyldarynyń tezirek toqtatylýyna úmittenetinin aıtty.
