بۇگىن ءۇش جىل قاتارىنان ءداستۇرلى تۇردە ۇيىمداستىرىلىپ كەلە جاتقان «شىمكەنت جاستار ليگاسى» جوباسىنىڭ ءىىى - كەزەڭى ءوز مارەسىنە جەتتى. فينالدىق ويىندار قايتا جاڭعىرىپ، رەكونسترۋكتسيالانعان «مەتاللۋرگ» ستاديونىندا ءوتتى. شىمكەنتتىڭ تالاي جىلدىق تاريحىنا كۋا بولعان بۇل ستاديوندا جاستاردىڭ سپورتپەن الاڭسىز اينالىسۋىنا بارلىق قولايلى جاعدايلار جاسالعان.
«شىمكەنت جاستار ليگاسى» جوباسىندا فۋتبول، باسكەتبول، ۆولەيبول، شاحمات تۇرلەرىنەن 151 جالپى ورتا ءبىلىم بەرۋ مەكتەپتەرىنەن 500-دەن استام كوماندا جاساقتالىپ، 6 مىڭعا جۋىق وقۋشى قاتىستى. جوبانىڭ فينالدىق كەزەڭىنە قالا اكىمى مۇرات ايتەنوۆ قاتىسىپ، جوبانىڭ ماڭىزدىلىعىنا توقتالدى.
“وسىدان ءۇش جىل بۇرىن رەسپۋبليكادا العاشقى بولىپ «شىمكەنت جاستار ليگاسى» اتتى بىرەگەي جوبانى باستاعان بولاتىنبىز. بۇل جوبا ءساتتى جۇزەگە اسىپ، مەكتەپ وقۋشىلارىنىڭ، مۇعالىمدەر مەن اتا-انالاردىڭ ۇلكەن قولداۋىنا يە بولىپ وتىر. ءداستۇرلى تۇردە ۇيىمداستىرىلىپ كەلە جاتقان بۇل جارىس جاستارىمىزدىڭ بۇقارالىق سپورتقا قىزىعۋشىلىعىن ارتتىرۋدا.
بيىل ليگاعا 6 مىڭنان استام وقۋشىنىڭ قاتىسۋى – ليگانىڭ بۇقارالىق سيپات العانىنىڭ كورىنىسى” – دەدى قالا اكىمى.
سالتاناتتى شارادا ماۋسىمنىڭ جەڭىمپازدارى ماراپاتتالدى. ءار سپورت ءتۇرى بويىنشا چەمپيون كوماندالارعا دەمەۋشىلەردىڭ قولداۋىمەن الىنعان 20 ميلليون تەڭگەنىڭ 4 شاعىن اۆتوبۋسى تابىستالدى.
شاحماتتان - ءو.جولداسبەكوۆ اتىنداعى №9 ءىت ليتسەيىنىڭ، ۆولەيبولدان - ا.بايتۇرسىنوۆ اتىنداعى №50 مەكتەپ-گيمنازياسىنىڭ، باسكەتبولدان - م.ح.دۋلاتي اتىنداعى №8 گيمنازيانىڭ، ال، فۋتبولدان — ت.تاجىباەۆ اتىنداعى №47 مەكتەپ-گيمنازياسىنىڭ كوماندالارى ليگانىڭ چەمپيونى اتاندى.
