رەسەي پرەزيدەنتى ۆلاديمير پۋتين ۋكرايناعا قاتىستى ۆاتيكاندا نەمەسە جاقىن ارادا باسقا ەلدە وتەتىن بەيبىت كەلىسسوزدەرگە قاتىسپايدى، بۇل تۋرالى 22 مامىر كۇنى Bloomberg اگەنتتىگى رەسەيلىك شەنەۋنىكتەرگە سىلتەمە جاساپ جاريالادى، دەپ حابارلايدى “ادىرنا” ۇلتتىق پورتالى.
كرەمل 16 مامىردا ىستامبۇلدا باستالعان تەحنيكالىق دەڭگەيدەگى كەلىسسوزدەرگە باسىمدىق بەرۋدى ءجون كورەدى.
ساياساتتانۋشى سەرگەي ماركوۆتىڭ ايتۋىنشا، پۋتين ناتو-عا مۇشە يتالياعا «قاۋىپسىزدىك سەبەپتەرىنە بايلانىستى» بارمايدى جانە رەسەي ۆاتيكاندى قاقتىعىستا بەيتاراپ تاراپ دەپ ەسەپتەمەيدى.
كەلىسسوزدەرگە ۆاتيكاننىڭ تارتىلۋى رەسەي پراۆوسلاۆ شىركەۋىنىڭ دە كۇدىگىن تۋدىرادى – ولار قاسيەتتى تاقتى ۋكرايناداعى «تاريحي قارسىلاس» رەتىندە قاراستىرادى جانە كيەۆ بيلىگىن ماسكەۋ پاتريارحاتىنا باعىنىشتى ۋكراين پراۆوسلاۆ شىركەۋىنىڭ حرامدارىن جاپقانى ءۇشىن ايىپتاعان جوق دەپ سىنايدى.
كرەملگە جاقىن ءۇش دەرەككوزدىڭ ايتۋىنشا، ماسكەۋ بولاشاق بەيبىتشىلىك تۋرالى مەموراندۋم شارتتارىن تالقىلاۋ ءۇشىن تۇركيانى الاڭ رەتىندە تاڭداعان. ەۋروپالىق جوعارى لاۋازىمدى شەنەۋنىكتىڭ پىكىرىنشە، رەسەيدىڭ تۇركيانى جانە 2022 جىلعى كەلىسسوزدەرگە قاتىسۋشىلاردى تاڭداۋى – ماسكەۋدىڭ "باستاپقى نۇكتەگە ورالعىسى كەلەتىنىن" ءبىلدىرۋى مۇمكىن.
اگەنتتىك دەرەككوزدەرى اقش قازىرگى ۋاقىتتا كيەۆپەن بايلانىستا بولىپ، كەلىسسوزدەرگە ىقپال ەتۋگە تىرىسىپ جاتقانىن، سونىمەن قاتار ماسكەۋگە كەلىسسوزدەرگە "قاتاڭ ۇستانىمداعى" تۇلعالاردىڭ، مىسالى ۆلاديمير مەدينسكيدىڭ (16 مامىرداعى جانە 2022 جىلعى ىستامبۇل كەلىسسوزدەرىندە رەسەيلىك دەلەگاتسيانى باسقارعان پرەزيدەنت كومەكشىسى) قاتىسۋىن قۇپتامايتىنىن جەتكىزۋدە ەكەنىن حابارلادى.
ۆاتيكاندا كەلىسسوزدەر وتكىزۋ يدەياسىن اقش پرەزيدەنتى دونالد ترامپ ۇسىنعان. كەيىن بۇل باستامانى جاڭا ريم پاپاسى XIV لەو قولدادى. 21 مامىردا فينليانديا پرەزيدەنتى الەكساندر ستۋبب وق اتۋدى توقتاتۋ تۋرالى كەلىسسوزدەر كەلەسى اپتادا ۆاتيكاندا ءوتۋى مۇمكىن ەكەنىن ايتتى.
The Washington Post باسىلىمى يتاليانىڭ رەسەيگە ونىڭ وكىلدەرىن كەلىسسوزدەرگە قاتىسۋ ءۇشىن كىرگىزۋگە دايىن ەكەنىن حابارلاعانىن جازدى. الايدا بۇل دايىندىق ءپۋتيننىڭ وزىنە قاتىستى ما، جوق پا، بەلگىسىز. ويتكەنى وندا حالىقارالىق قىلمىستىق سوتتىڭ (حقس) وردەرى بار. يتاليا حقس يۋريسديكتسياسىن مويىندايدى جانە ريم ستاتۋتىن راتيفيكاتسيالاعان.
ايتا كەتسەك، 16 مامىر كۇنى ىستامبۇلدا رەسەي مەن ۋكراينا دەلەگاتسيالارى 2022 جىلدان بەرى العاش رەت كەزدەستى. The Economist دەرەگىنشە، ماسكەۋ دونەتسك، لۋگانسك، حەرسون جانە زاپوروجە وبلىستارىن باقىلاۋعا الۋدى تالاپ ەتكەن، الايدا بۇل ايماقتاردى تولىقتاي باسىپ الۋعا ءالى قاۋقارسىز. باسىلىمنىڭ دەرەككوزى بويىنشا، ۆلاديمير مەدينسكي ەگەر رەسەي تالاپتارى ورىندالماسا، "سوعىستى شەكسىز جالعاستىرا بەرۋگە" دايىن ەكەنىن اشىق ايتقان. كەلىسسوزدەر بەيبىتشىلىككە قاتىستى ناقتى كەلىسىمسىز اياقتالدى. ۋكراينا قانداي دا ءبىر اۋماقتىق جەڭىلدىكتەرگە بارۋدان ءۇزىلدى-كەسىلدى باس تارتتى.
19 مامىردا پۋتين مەن ترامپتىڭ ەكى ساعاتتىق تەلەفون ارقىلى سويلەسۋى دە شەشۋشى ناتيجە اكەلمەدى. The Financial Times مالىمەتىنشە، بۇل اقش-تىڭ ەۋروپالىق جانە ۋكراينالىق سەرىكتەستەرىن رەنجىتتى. باسىلىم دەرەككوزدەرىنىڭ ايتۋىنشا، ترامپ ەندى دەلدال رەتىندە بەلسەندى ءرول ويناۋدان باس تارتىپ، رەسەي مەن ۋكرايناعا كەلىسىمگە وزدەرى كەلۋىنە مۇمكىندىك بەرەتىنىن مالىمدەگەن.
21 مامىردا The Wall Street Journal (WSJ) ءۇش دەرەككوزگە سىلتەمە جاساپ، اقش پرەزيدەنتى دونالد ترامپ پۋتينمەن سويلەسكەننەن كەيىن ەۋروپا كوشباسشىلارىن رەسەي پرەزيدەنتىنىڭ ۋكرايناداعى سوعىستى توقتاتۋعا نيەتتى ەمەستىگىنە سەنىمدى ەكەنى تۋرالى حاباردار ەتكەنىن جازدى. سەبەبى پۋتين سوعىستا جەڭىپ جاتقانىنا سەنىمدى.
باسىلىمنىڭ جازۋىنشا، ەۋروپا كوشباسشىلارى ءپۋتيننىڭ بەيبىتشىلىككە ۇمتىلمايتىنىن سەزگەن، بىراق مۇنى العاش رەت ترامپتىڭ ءوز اۋزىنان ەستىدى. ايتا كەتەرلىگى، بۇل ترامپتىڭ پۋتين بەيبىتشىلىككە شىن نيەتتى دەگەن بۇرىنعى جاريا مالىمدەمەلەرىنە قايشى كەلدى.
