قازاقستاندا كوروناۆيرۋسقا قاتىستى شەكتەۋلەر رەسمي تۇردە الىنىپ تاستالدى، - دەپ حابارلايدى "ادىرنا" ۇلتتىق پورتالى. بۇل تۋرالى دەنساۋلىق ساقتاۋ مينيسترلىگى مالىمدەدى.
"دۇنيەجۇزىلىك دەنساۋلىق ساقتاۋ ۇيىمىنىڭ COVID-19 پاندەمياسىنىڭ اياقتالۋى، قازاقستاندا جانە الەمدە كوروناۆيرۋس ينفەكتسياسى بويىنشا ەپيدەميولوگيالىق جاعدايدىڭ تۇراقتانۋى تۋرالى حابارلاۋىنا بايلانىستى، ءبىلىم بەرۋ ۇيىمدارىندا، سونداي-اق "Ashyq" جوباسىندا حالىقتىڭ اراسىندا كوروناۆيرۋس ينفەكتسياسىنا قارسى كۇرەس جونىندەگى شەكتەۋ شارالارىن كوزدەيتىن قازاقستان رەسپۋبليكاسى باس مەملەكەتتىك سانيتاريالىق دارىگەرىنىڭ قاۋلىلارىنىڭ كۇشى جويىلدى" دەلىندى مينيسترلىك سايتىندا.
وسىلايشا، "قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ كەيبىر قاۋلىلارىنىڭ كۇشىن جويۋ تۋرالى" قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرىنىڭ 2023 جىلعى 19 مامىرداعى №5 قاۋلىسىنا قول قويىلدى. وسى قاۋلىنىڭ تولىق ماتىنىمەن قازاقستان رەسپۋبليكاسى دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ سايتىندا تانىسۋعا بولادى.
"سونىمەن قاتار، COVID-19 كوروناۆيرۋس ينفەكتسياسى جويىلماعانىن حابارلايمىز، ۆيرۋستىڭ تارالۋى جالعاسۋدا، بىراق اۋرۋدىڭ سالىستىرمالى تۇردە جەڭىل اعىمىن ەسكەرە وتىرىپ، كەيىننەن حالىقتىڭ سىرقاتتانۋشىلىعىن باقىلاۋ باسقا ۆيرۋستىق ينفەكتسيالارمەن قاتار تۇراقتى نەگىزدە جۇزەگە اسىرىلاتىن بولادى" دەپ قوستى دەنساۋلىق ساقتاۋ مينيسترلىگى.
"ادىرنا" ۇلتتىق پورتالى
