قوناەۆ قالالىق مادەنيەت ۇيىندە وبلىستىق ءماسليحاتتىڭ كەزەكتى III سەسسياسى ءوتتى. وعان وبلىس اكىمى مارات سۇلتانعازيەۆ، باسقارما باسشىلارى مەن ءماسليحات دەپۋتاتتارى قاتىستى. سەسسيا جۇمىسىن وبلىستىق ءماسليحاتتىڭ توراعاسى تالعات بايەدىلوۆ جۇرگىزدى.
ءبىرىنشى ماسەلە بويىنشا الماتى وبلىسىنىڭ 2022 جىلعا ارنالعان بيۋدجەتىنىڭ اتقارىلۋى تۋرالى وبلىستىق قارجى باسقارماسىنىڭ باسشىسى بيبىگۇل ۇزاقوۆا بايانداما جاسادى.
ۇزاقوۆانىڭ ايتۋىنشا، وتكەن جىلى ەكونوميكا سەكتورىنىڭ بارلىق باعىتىندا ءوسۋ قارقىنى بايقالىپ، وبلىستىڭ جالپى وڭىرلىك ءونىمى 2022 جىلدىڭ 9 ايىندا 2538,5 ملرد تەڭگەنى، جان باسىنا شاققاندا 1 706,3 ملن تەڭگەنى قۇراعان. ونەركاسىپتە وڭدەۋشى سەكتوردىڭ 8,7 پايىزعا ۇلعايۋى ەسەبىنەن ءوندىرىس كولەمى 8,9 پايىزعا ارتىپ، 1,5 ترلن تەڭگەدەن اسقان.
«اۋىل شارۋاشىلىعىندا جالپى ءونىم 736,5 ملرد تەڭگەگە جەتتى نەمەسە 2021 جىلمەن سالىستىرعاندا 100,1 پايىزعا ورىندالدى. ونىڭ ىشىندە مال شارۋاشىلىعى ءونىمىنىڭ ءوندىرىسى 2,3 پايىزعا ءوستى. جالپى اوك-ءنى قولداۋعا 34,1 ملرد تەڭگە، ونىڭ ىشىندە سۋبسيديالارعا 31,0 ملرد تەڭگە باعىتتالدى. 15 مىڭعا جۋىق شارۋا قوجالىعىنا قولداۋ كورسەتىلدى.
شاعىن جانە ورتا بيزنەستىڭ بەلسەندى سۋبەكتىلەرىنىڭ سانى 116,6 مىڭ بىرلىكتى قۇرادى. وبلىس ەكونوميكاسىنا 609 ملرد تەڭگەدەن استام ينۆەستيتسيا تارتىلدى، ءوسىم 14,1 پايىزدى قۇرادى. بيىلعى ساۋدا كولەمى 8,4 پايىزعا ۇلعايىپ، 1,6 ترلن تەڭگەنى قۇرادى. مەملەكەتتىك بيۋدجەت جوسپارى 105 پايىزعا ورىندالدى، جوسپار بويىنشا 743,2 ملرد تەڭگە بولسا، 780,1 ملرد تەڭگە ءتۇستى. رەسپۋبليكالىق بيۋدجەتكە 384,0 ملرد تەڭگە، جەرگىلىكتى بيۋدجەتكە 396,1 ملرد تەڭگە ءتۇستى»، - دەدى باسقارما باسشىسى.
وتكەن جىلعى بيۋدجەتتىڭ شامامەن 50,1 پايىزى الەۋمەتتىك شىعىستارعا، دەمەك، ءبىلىم بەرۋ، سپورت، دەنساۋلىق ساقتاۋ، الەۋمەتتىك كومەك جانە الەۋمەتتىك قامسىزداندىرۋ سالاسىنا جانە 49,9 پايىزى ناقتى سەكتورعا جانە باسقا دا شىعىستارعا، ياعني، تۇرعىن ءۇي-كوممۋنالدىق، اۋىل شارۋاشىلىعى جانە ەرەكشە قورعالاتىن تابيعي اۋماقتار، كولىك جانە كوممۋنيكاتسيا، قۇرىلىس قىزمەتىنە باعىتتالدى.
