Qonaev qalalyq Mádenıet úıinde oblystyq máslıhattyń kezekti III sessııasy ótti. Oǵan oblys ákimi Marat Sultanǵazıev, basqarma basshylary men máslıhat depýtattary qatysty. Sessııa jumysyn oblystyq máslıhattyń tóraǵasy Talǵat Baıedilov júrgizdi.
Birinshi másele boıynsha Almaty oblysynyń 2022 jylǵa arnalǵan bıýdjetiniń atqarylýy týraly oblystyq qarjy basqarmasynyń basshysy Bıbigúl Uzaqova baıandama jasady.
Uzaqovanyń aıtýynsha, ótken jyly ekonomıka sektorynyń barlyq baǵytynda ósý qarqyny baıqalyp, oblystyń jalpy óńirlik ónimi 2022 jyldyń 9 aıynda 2538,5 mlrd teńgeni, jan basyna shaqqanda 1 706,3 mln teńgeni quraǵan. Ónerkásipte óńdeýshi sektordyń 8,7 paıyzǵa ulǵaıýy esebinen óndiris kólemi 8,9 paıyzǵa artyp, 1,5 trln teńgeden asqan.
«Aýyl sharýashylyǵynda jalpy ónim 736,5 mlrd teńgege jetti nemese 2021 jylmen salystyrǵanda 100,1 paıyzǵa oryndaldy. Onyń ishinde mal sharýashylyǵy óniminiń óndirisi 2,3 paıyzǵa ósti. Jalpy AÓK-ni qoldaýǵa 34,1 mlrd teńge, onyń ishinde sýbsıdııalarǵa 31,0 mlrd teńge baǵyttaldy. 15 myńǵa jýyq sharýa qojalyǵyna qoldaý kórsetildi.
Shaǵyn jáne orta bıznestiń belsendi sýbektileriniń sany 116,6 myń birlikti qurady. Oblys ekonomıkasyna 609 mlrd teńgeden astam ınvestıııa tartyldy, ósim 14,1 paıyzdy qurady. Bıylǵy saýda kólemi 8,4 paıyzǵa ulǵaıyp, 1,6 trln teńgeni qurady. Memlekettik bıýdjet jospary 105 paıyzǵa oryndaldy, jospar boıynsha 743,2 mlrd teńge bolsa, 780,1 mlrd teńge tústi. Respýblıkalyq bıýdjetke 384,0 mlrd teńge, jergilikti bıýdjetke 396,1 mlrd teńge tústi», - dedi basqarma basshysy.
Ótken jylǵy bıýdjettiń shamamen 50,1 paıyzy áleýmettik shyǵystarǵa, demek, bilim berý, sport, densaýlyq saqtaý, áleýmettik kómek jáne áleýmettik qamsyzdandyrý salasyna jáne 49,9 paıyzy naqty sektorǵa jáne basqa da shyǵystarǵa, ıaǵnı, turǵyn úı-kommýnaldyq, aýyl sharýashylyǵy jáne erekshe qorǵalatyn tabıǵı aýmaqtar, kólik jáne kommýnıkaııa, qurylys qyzmetine baǵyttaldy.
