الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىم «جاڭا باستامالار - جاڭا مۇمكىندىكتەر»، «الەۋمەتتىك يدەيالار مەن جوبالار جارمەڭكەسى-2023» اتتى بايقاۋدىڭ جەڭىمپازدارىن ماراپاتتادى.
كونكۋرس قوعامدىق ۇيىمداردىڭ الەۋەتىن وزەكتى الەۋمەتتىك جانە قوعامدىق ماڭىزى بار مىندەتتەردى شەشۋگە باعىتتالعان. وبلىس اكىمدىگى 10 جوبانى قولداۋعا جالپى سوماسى 10 ملن تەڭگە گرانت ءبولدى. اعىمداعى جىلى 30 ءوتىنىم بەرىلدى جانە ولاردىڭ ۇشتەن ءبىرى عانا قارجىلاي قولداۋعا يە بولا الدى. وبلىس اكىمىنىڭ ءبىرىنشى ورىنباسارى بۇگىنگى تاڭدا ەلىمىزدەگى ازاماتتىق قوعام ينستيتۋتتارى مەملەكەتتىڭ تىرەگى جانە ارىپتەسى بولىپ تابىلاتىنىن اتاپ ءوتتى. شارا بارىسىندا "دەنساۋلىق - زور بايلىق" مۇگەدەكتەر قوعامدىق بىرلەستىگىنىڭ باسشىسى شولپان جانباباەۆاعا كومەگى ءۇشىن ۇلكەن العىسىن ءبىلدىردى، سەبەبى ء"ۇمىت ساۋلەسى" ورتالىعىندا جاڭا جابدىق پايدا بولادى. ال ۇزىناعاش اۋىلىنىڭ مۇگەدەكتەر قوعامىنىڭ باسشىسى گۇلزات اسقاروۆا دا بايقاۋدىڭ ماڭىزدىلىعىن ايتىپ بەردى.
- قوعامدى دەموكراتيالاندىرۋ ساياساتىنىڭ ارقاسىندا بۇل باعىتتا كوپتەگەن يگى ىستەر اتقارىلۋدا. جىلدان جىلعا زاڭدى بازا جەتىلدىرىلۋدە، قارجى قورى بولىنۋدە، مەملەكەتتىك ورگاندار مەن ۇكىمەتتىك ەمەس سەكتوردىڭ ءوزارا ءىس-قيمىلى نىعايتىلۋدا، ياعني وسى سەكتوردى دامىتۋدىڭ مەملەكەتتىك جۇيەسى قالىپتاستىرىلۋدا. جەڭىمپاز جوبالار ءوڭىرىمىزدىڭ وزەكتى ماسەلەلەرىن شەشۋگە دايىن ەكەنىنە سەنىمدىمىن، - دەدى الماتى وبلىسى اكىمىنىڭ ءبىرىنشى ورىنباسارى نۇرلان ءابدىراحىموۆ.
ءىس شارا بارىسىندا جامبىل اۋدانى ۇزىناعاش اۋىلى مۇگەدەكتەر قوعامىنىڭ باسشىسى گۇلزات اسقاروۆا ءسوز الىپ، بەرگەن مۇمكىندىكتەر ءۇشىن العىسىن ءبىلدىردى.
- ءبىز ينۆاتاكسي جانە جەكە كومەكشىنىڭ قىزمەتىن ۇسىنۋمەن اينالىسامىز. بۇگىن جەڭىپ العان گرانت ماسساج جابدىعىنا، بالالارعا ارنالعان ماسساج بولمەسىن اشۋعا جۇمسالادى. ماسساج بارلىق بالالارعا قول جەتىمدى بولادى، كوبىنە مۇمكىندىگى شەكتەۋلى بالالاردىڭ وڭالۋىنا باعىتتالماق. دەگەنمەن، ەرەسەكتەر دە ەم قابىلداۋ ءۇشىن الدىن الا جازىلا الادى. اكىمدىك بىزگە ورتالىقتىڭ قۇرىلىسىنا 8 سوتىق جەر ءبولدى جانە قازىر بۇل جۇمىستى جاقىن ارادا باستاۋ ءۇشىن ينۆەستورلاردى تولىققاندى ىزدەۋ ءجۇرىپ جاتىر. بولاشاقتا ورتالىقتا مۇگەدەكتىگى بار بالالاردى دايارلاۋ وتەدى، وندا ولار ءبىلىم الىپ، كەيىننەن قوعامعا ەلەۋلى ۇلەس قوسىپ جۇمىسقا ورنالاسادى، - دەدى گۇلزات اسقاروۆا.
قورىتىندىلاي كەلە، وبلىس اكىمنىڭ ءبىرىنشى ورىنباسارى نۇرلان ءابدىراحىم گرانتتاردى تاپسىرىپ، بارلىق جەڭىمپازدارعا قوعام يگىلىگى جولىنداعى جۇمىستارىنا تابىس تىلەدى.
