الماتى وبلىسىندا كاسىپكەرلىكتى مەملەكەتتىك قولداۋ باعدارلامالدارى كەڭىنەن ءتۇسىندىرىلدى.
ءوڭىر اۋماعىندا اتقارىلعان شارا ەڭبەكشىقازاق اۋدانىندا جالعاسىن تاپتى. اۋدان حالقىنا مەملەكەت تاراپىنان كاسىپكەرلىككە بەرىلەتىن قولداۋدىڭ سان تارماعى تارقاتىلىپ ايتىلعان كەزدەسۋ وبلىستىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ ۇيىمداستىرۋىمەن «الماتى وبلىسى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى»، الماتى وبلىسىنىڭ كاسىپكەرلەر پالاتاسى جانە «دامۋ» الماتى وبلىسى اۋماقتارىن دامىتۋ ورتالىعى ماماندارىنىڭ باستاما كوتەرۋىمەن ۇيىمداستىرىلدى.
ەلمەن جۇزدەسۋدە كۇن تارتىبىندە جاستاردى 2,5 پايىزدىق مولشەرلەمەمەن شاعىن نەسيە بەرۋ ماسەلەسى تالقىلاندى. ايماق حالقىنىڭ تابىس كوزىن ارتتىرۋعا ىقپال ەتۋ ماقساتىندا جۇزەگە اسىرىلىپ جاتقان باعدارلامانىڭ بولاشاعى زور، اياسى كەڭ. تەك ناسيحات جۇمىستارى جاندانىپ، جالىندى جاستاردىڭ بىلەك سىبانا كىرىسۋى عانا جەتكىلىكتى.
سونىمەن قاتار، ماماندار 1 380 000 تەڭگە جانە 5000000 تەڭگەگە دەيىنگى مەملەكەتتىك قايتارىمسىز گرانتتار بەرۋ جايى تۋرالى دا ايتتى. جانە «اۋىل اماناتى» جوبالارى تانىستىرىلدى. كەزدەسۋ بارىسىندا اۋىل تۇرعىندارىنا ءوز بيزنەسىن اشۋعا نەمەسە بۇرىنعى ءىسىن كەڭەيتۋگە قاجەتتى اقپاراتتار مەن ءتۇرلى مۇمكىندىكتەر بار ەكەندىگى تۋرالى ماعلۇماتتار الدى.
