اۋىلداعى اعايىننىڭ ايىنىڭ وڭىنان تۋىنا ۇكىمەتتە ات سالىسىپ جاتىر. حالىقتىڭ تابىسىن ارتتىرۋدىڭ بىرىڭعاي تەتىگى جاساقتالىپ، مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس، وتكەن جىلدىڭ ءساۋىر ايىندا حالىقتىڭ تابىسىن 2025 جىلعا دەيىن ارتتىرۋ باعدارلاماسى بەكىتىلگەن ەدى. باس قۇجاتتىڭ اياسىندا ەلدەگى باس پارتيا «Amanat» ۇكىمەتپەن بىرلەسىپ، «اۋىل اماناتى» جوباسىن قولعا العان بولاتىن.
اۋىل شارۋاشىلىعى تاۋارىن وندىرۋشىلەردى جان-جاقتى قولداۋ، اۋىل تۇرعىندارىن اتالمىش سالادا كاسىپ باستاۋىنا بارىنشا تارتۋدى كوزدەگەن بۇل باعدارلاما الماتى وبلىسىندا دا جۇزەگە اسۋدا.
ۇكىمەتتە ساۋىردە بەكىتىلگەن بۇيرىققا سايكەس، الماتى وبلىسى اكىمدىگى قازان ايىندا «حالىقتىڭ تابىسىن ارتتىرۋ جوباسىنا قاتىساتىن باسقارمالار مەن اۋدانداردىڭ تىزبەسىن بەكىتۋ تۋرالى» № 327 قاۋلىسىن قابىلداعان ەدى. جالپى، قايتا تۇلەگەن وبلىستا «اۋىل اماناتى» اۋىل حالقىنىڭ تابىسىن ارتتىرۋ باعدارلاماسىنا ەڭبەكشىقازاق، كەگەن، رايىمبەك، بالقاش، جامبىل، ۇيعىر اۋداندارى مەن 102 اۋىلدىق وكرۋگ جانە 134 ەلدى مەكەن قاتىسادى دەپ جوسپارلانعان ەدى.
الماتى وبلىسى اۋىل شارۋاشىلىعى باسقارماسىنىڭ ماندەتىن اتقارۋشى كويۋمچان وماروۆتىڭ ايتۋىنشا، ءار اۋدان بويىنشا جۇمىس كوميسسيالارى، ال اۋىلدىق وكرۋگتەردە نەسيە الۋشىلاردىڭ وتىنىشتەرىن باستاپقى جيناۋ جانە وڭدەۋ بويىنشا جۇمىس توپتارى قۇرىلعان.
جاۋاپتىلاردىڭ سوزىنە سۇيەنسەك، بيىلىعى جىلعا وبلىسقا «اۋىل اماناتى» جوباسى اياسىندا 8,3 ملرد. تەڭگە قارجى بولىنگەن. ونىڭ ىشىندە، 2,3 ملرد. تەڭگە نەگىزگى سوما بولسا، 6,0 ملرد. تەڭگە قوسىمشا بولىنگەن قارجى.
«اۋىل اماناتى» - ءوڭىردىڭ الەۋەتىن جاقسارتۋعا باعىتتالعان بىرەگەي باعدارلاما. الماتى وبلىسى حالقىنىڭ باسىم بولىگى اۋىلدى جەردە تۇراتىندىقتان ءبىز ءۇشىن وراسان زور پايداسى تيمەك. ماسەلەن، جوبانى ىسكە اسىرۋ كەزىندە وسىمدىك شارۋاشىلىعىنداعى جالپى ءونىم 1%-عا، مال شارۋاشىلىعىنداعى 3%-عا جانە تەحنيكا مەن جابدىقتار پاركىن جاڭارتۋ 4%-عا ۇلعايادى دەپ كۇتىلۋدە. بۇل جوسپار ورىندالسا، شارۋاشىلىقتا ونىمدىلىك ارتىپ، ، وڭ ديناميكا ساقتالماق»، - دەيدى كويۋمچان اۆانۇلى.
ايتا كەتۋ كەرەك، باعدارلاما بەس نەگىزگى باعىت بويىنشا جۇزەگە اسىرىلادى. جاۋاپتىلاردىڭ ايتۋىنشا، وبلىس كولەمىندە بارلىق اۋدانداردان 5 باعىت بويىنشا 22,8 ملرد. تەڭگەگە 3 955 ءوتىنىم تۇسكەن. قازىرگى تاڭدا ناقتى 4,4ملرد. تەڭگەنى قۇرايتىن 891 جوباعا قۇجات وتكىزىلگەن.
الداعى ۋاقىتتا الماتى وبلىسىندا اۋىل تۇرعىندارى اۋىل شارۋاشىلىعى كووپەراتيۆتەرى قۇرامىندا كاسىپتەرىن دامىتۋ ءۇشىن جەڭىلدەتىلگەن نەسيە الۋ كوزدەلۋدە. بۇگىنگى كۇنى وبلىستا «اۋىل اماناتى» جوباسىنىڭ شەڭبەرىندە 3 اۋىل شارۋاشىلىعى كووپەراتيۆى تىركەلگەن، قوسىمشا تاعى 19 كووپەراتيۆ قۇرۋ جوسپارلانۋدا.
