Aýyldaǵy aǵaıynnyń aıynyń ońynan týýyna úkimette at salysyp jatyr. Halyqtyń tabysyn arttyrýdyń biryńǵaı tetigi jasaqtalyp, memleket basshysy Qasym-Jomart Toqaevtyń tapsyrmasyna sáıkes, ótken jyldyń sáýir aıynda halyqtyń tabysyn 2025 jylǵa deıin arttyrý baǵdarlamasy bekitilgen edi. Bas qujattyń aıasynda eldegi bas partııa «Amanat» úkimetpen birlesip, «Aýyl Amanaty» jobasyn qolǵa alǵan bolatyn.
Aýyl sharýashylyǵy taýaryn óndirýshilerdi jan-jaqty qoldaý, aýyl turǵyndaryn atalmysh salada kásip bastaýyna barynsha tartýdy kózdegen bul baǵdarlama Almaty oblysynda da júzege asýda.
Úkimette sáýirde bekitilgen buıryqqa sáıkes, Almaty oblysy ákimdigi qazan aıynda «Halyqtyń tabysyn arttyrý jobasyna qatysatyn basqarmalar men aýdandardyń tizbesin bekitý týraly» № 327 qaýlysyn qabyldaǵan edi. Jalpy, qaıta túlegen oblysta «Aýyl Amanaty» aýyl halqynyń tabysyn arttyrý baǵdarlamasyna Eńbekshiqazaq, Kegen, Raıymbek, Balqash, Jambyl, Uıǵyr aýdandary men 102 aýyldyq okrýg jáne 134 eldi meken qatysady dep josparlanǵan edi.
Almaty oblysy aýyl sharýashylyǵy basqarmasynyń mándetin atqarýshy Koıýmchan Omarovtyń aıtýynsha, ár aýdan boıynsha jumys komıssııalary, al aýyldyq okrýgterde nesıe alýshylardyń ótinishterin bastapqy jınaý jáne óńdeý boıynsha jumys toptary qurylǵan.
Jaýaptylardyń sózine súıensek, bıylyǵy jylǵa oblysqa «Aýyl Amanaty» jobasy aıasynda 8,3 mlrd. teńge qarjy bólingen. Onyń ishinde, 2,3 mlrd. teńge negizgi soma bolsa, 6,0 mlrd. teńge qosymsha bólingen qarjy.
«Aýyl Amanaty» - óńirdiń áleýetin jaqsartýǵa baǵyttalǵan biregeı baǵdarlama. Almaty oblysy halqynyń basym bóligi aýyldy jerde turatyndyqtan biz úshin orasan zor paıdasy tımek. Máselen, jobany iske asyrý kezinde ósimdik sharýashylyǵyndaǵy jalpy ónim 1%-ǵa, mal sharýashylyǵyndaǵy 3%-ǵa jáne tehnıka men jabdyqtar parkin jańartý 4%-ǵa ulǵaıady dep kútilýde. Bul jospar oryndalsa, sharýashylyqta ónimdilik artyp, , oń dınamıka saqtalmaq», - deıdi Koıýmchan Avanuly.
Aıta ketý kerek, baǵdarlama bes negizgi baǵyt boıynsha júzege asyrylady. Jaýaptylardyń aıtýynsha, oblys kóleminde barlyq aýdandardan 5 baǵyt boıynsha 22,8 mlrd. teńgege 3 955 ótinim túsken. Qazirgi tańda naqty 4,4mlrd. teńgeni quraıtyn 891 jobaǵa qujat ótkizilgen.
Aldaǵy ýaqytta Almaty oblysynda aýyl turǵyndary aýyl sharýashylyǵy kooperatıvteri quramynda kásipterin damytý úshin jeńildetilgen nesıe alý kózdelýde. Búgingi kúni oblysta «Aýyl Amanaty» jobasynyń sheńberinde 3 aýyl sharýashylyǵy kooperatıvi tirkelgen, qosymsha taǵy 19 kooperatıv qurý josparlanýda.
