ۇلتتىق عىلىم اكادەمياسى جاس عالىمداردىڭ باسىن قوسىپ، دوڭگەلەك ۇستەل وتكىزدى

1881
Adyrna.kz Telegram

قازاقستان رەسپۋبليكاسى پرەزيدەنتىنىڭ جانىنداعى قازاقستان رەسپۋبليكاسىنىڭ ۇلتتىق عىلىم اكادەمياسى (بۇدان ءارى – عىلىم اكادەمياسى) جاس عالىمداردىڭ باسىن قوسىپ «قازاقستان عىلىمى ماسەلەسىن انىقتاۋ جانە شەشۋ جولدارى» اتتى دوڭگەلەك ۇستەل وتكىزدى. شارانىڭ باستى ماقساتى – وتاندىق عىلىمدى دامىتۋ. جاس عالىمداردىڭ ويىن تىڭداپ، ولارعا مۇمكىندىك بەرۋ.

جيىنعا تورتكۇل دۇنيەنىڭ ءار قيىرىندا جۇرگەن 200-گە جۋىق جاس عالىم قاتىستى. اتاپ ايتساق، تۇركيا، ۇلىبريتانيا، اقش، قحر، پولشا، دانيا سەكىلدى ەلدەردە جۇرگەن قازاق عالىمدارى وتاندىق عىلىمنىڭ دامۋ تۇجىرىمداماسىنا قاتىستى پىكىر ءبىلدىردى.

دوڭگەلەك ۇستەلدى اشىپ بەرگەن قر پرەزيدەنتى جانىنداعى قر ۇعا باسقارما پرەزيدەنتى كۇنسۇلۋ زاكاريا باسقوسۋدىڭ ءمانى ەلىمىزدىڭ عىلىم الەۋەتىنىڭ دامۋى مەن بولاشاعىن ايقىنداۋ ەكەنىن ايتتى.

ۇلتتىق عىلىم اكادەمياسىنىڭ الدىندا ۇلكەن ميسسيا تۇر. عىلىم ارقاشان قوعامنىڭ قاجەتتىلىگىن وتەپ، ەكونوميكانىڭ باستى قوزعاۋشى لوكوماتيۆى بولۋ كەرەك. سول سەبەپتى، عىلىمدى كەڭىنەن ناسيحاتتاۋعا ارنالعان ۇزاق مەرزىمدى جوسپار ازىرلەنىپ، فورسايتتىق زەرتتەۋلەر جۇرگىزىلەدى. حالىقارالىق ىنتىماقتاستىق پەن عىلىمي كادرلاردىڭ بىلىكتىلىگىن ارتتىرۋ بويىنشا ناقتى شارالار قولدانۋدامىز، – دەدى ك. زاكاريا.

عىلىم اكادەمياسى جاس عالىمدارعا ەرەكشە كوڭىل ءبولىپ وتىر. وسى ارقىلى عىلىمعا جاناشىر ازاماتتاردىڭ ورتاسىن قالىپتاستىرۋدى كوزدەيدى. اتالعان باسقوسۋدا سالاداعى تۇيتكىلدى ماسەلەلەر ايتىلىپ، ونىڭ شەشىمى ورتاعا سالىندى. ماسەلەن، ساعاتتىق جۇمىس ىزدەۋگە ارنالعان «EasyTap» ونلاين سەرۆيسىنىڭ نەگىزىن قالاۋشى تولەش ماعزۇم كوپ عالىمنىڭ بيزنەسكە نەمقۇرايلى قارايتىنىن، سول باعىتتاعى ءبىلىمىنىڭ ازدىعىن تىلگە تيەك ەتتى. ونىڭ شەشىمى رەتىندە عالىمداردى بيزنەسكە وقىتۋ باعدارلاماسىن ۇسىندى. ولار سول ارقىلى سەرىكتەس تاۋىپ، بيزنەس جوبالارىن قوعام يگىلىگىنە قىزمەت ەتەتىن ونىمگە اينالدىرا الادى. ودان وزگە جوبانى كوممەرتسيالاندىرۋ، ينۆەستيتسيا تارتۋ مەن ارنايى گرانتتاردى ۇلەستىرۋ كەزىندە عالىمدار كەزىگەتىن ماسەلەلەر كوتەرىلدى.

اتالعان دوڭگەلەك ۇستەل جاس عالىمدارعا كەرى بايلانىس ورناتاتىن تاپتىرماس الاڭ بولدى. كەزدەسۋدە جاس عالىمدار ءۇشىن اشىق قولجەتىمدى زەرتحانالار كونسورتسيۋمىن قۇرۋ, ماقالالاردى رەتسەنزيالاۋ ءۇشىن ساۋاتتى، وتاندىق جانە شەتەلدىك ساراپشىلاردى تارتۋ جانە وتاندىق جۋرنالدارعا قارجىلىق قولداۋكورسەتۋ ارقىلى ساپاسى مەن مارتەبەسىن ارتتىرۋ، عىلىمي جۇمىستاردىڭ ناتيجەسى بويىنشا حيرش يندەكسىن عانا كوتەرۋ ەمەس، جۇمىستىڭ ساپاسىن باعالايتىن كريتەري ەنگىزۋ، ءوندىرىس & جوو & عزي-مەن بايلانىسۋ ءۇشىن بىرىڭعاي ەلەكتروندىق پورتال قۇرۋ، مۇمكىندىگى شەكتەۋلى، مۇگەدەك، ەرەكشە قاجەتتىلىكتەرى بار ادامداردى قولداي الاتىن عىلىمي جانە ءبىلىم بەرۋ قىزمەتىنىڭ ينكليۋزيۆتى ورتاسىن قالىپتاستىرۋ سىندى ۇسىنىستار ايتىلدى.

قازاقستان رەسپۋبليكاسى پرەزيدەنتىنىڭ جانىنداعى قر ۇلتتىق عىلىم اكادەمياسىنا قاراستى جاس عالىمدار اكادەمياسىن جانە بارلىق سالالار بويىنشا جاس عالىمدار كەڭەسىن قۇرۋدى جوسپارى دا ۇسىنىلدى.

 

پىكىرلەر