اشىلۋ ءراسىمى 1 ماۋسىمعا جوسپارلانعان.
سكەيت-الاڭنىڭ ramp, rail, bank, quarter pipe جانە باسقا دا قۇرىلىستارى ورناتىلىپ، سكەيت تەبۋشىلەردى قابىلداۋعا دايىن. بۇل قوناەۆ قالاسىنداعى قۇرىلىسى اياقتالۋعا جاقىن جاڭا سكەيت الاڭنىڭ ەلەمەنتتەرى.
قۇرىلىسشىلارعا اباتتاندىرۋ، كوگالداندىرۋ جۇمىستارى عانا قالدى. جەرگىلىكتى تۇرعىندار اشىلۋدى تاعاتسىزدانا كۇتۋدە – سەبەبى، بەيرەسمي ستاتيستيكا بويىنشا، قالاداعى 1000-نان استام ءجاسوسپىرىم ەكسترەمالدى BMX, بورت جانە سكەيت تەبۋمەن اينالىسقاندى جاقسى كورەدى.
بۇل جەردەگى ەسكى الاڭ وتە شاعىن بولدى جانە قازىرگى جاڭا الاڭداعىداي تريۋكتەردى ورىنداۋ ءۇشىن قاجەتتى 10 نەگىزگى قۇرىلىم تۋرالى ويلاۋ مۇمكىن ەمەس بولىپ كورىندى. جالپى اۋدانى 9400 م2 جەردە سكەيت الاڭى (2000 م2), بالالار الاڭى (400 م2), ۆوركاۋت (جاتتىعۋ الاڭى) (200 م2), فوتوايماق، سونىمەن قاتار دەمالۋعا بولاتىن ايماق بار. قولدانىلاتىن ماتەريالدار ەرەكشە نازار اۋدارۋعا لايىق - جوعارى ساپالى، انتيۆاندالدىق، تەمپەراتۋرانىڭ شەكتەن تىس جانە تابيعاتتىڭ كەز-كەلگەن جاعدايىنا ءتوزىمدى.
الماتى وبلىسىنىڭ اكىمى مارات سۇلتانعازيەۆ نىساندى ارالاۋ بارىسىندا ونىڭ بىرەگەيلىگىن اتاپ ءوتتى: «بۇل جەردە ءبىز حالىقارالىق تۋرنيرلەر مەن جارىستار وتكىزىپ، سول ارقىلى جەرگىلىكتى سپورتتى دامىتىپ قانا قويماي، قالاعا كاسىبي مامانداردى تارتامىز. ال نىساندى ۋاقىتىندا تاپسىرىپ ۇلگەرۋ ءۇشىن جۇمىسشىلاردى كوبىرەك تارتۋ كەرەك».
سونىمەن قاتار، ساياباقتا اۋقىمدى قايتا قۇرۋ جۇمىستارى جۇرگىزىلۋدە: اباتتاندىرۋدان، بالالار جانە ويىن الاڭدارىن، ونىڭ ىشىندە فۋتبول الاڭىن جابدىقتاۋدان باسقا، اۋدانى 150 م2 مۇز ارەناسىن سالۋ جوسپارلانۋدا. ول جابىق بولادى جانە جىل بويى جۇمىس ىستەي الادى، قىستا كونكيمەن سىرعاناۋ اۋەسقويلارىن قابىلدايدى، ال جازدا ول روليكتى-الاڭ رەتىندە پايدالانىلادى. جاعالاۋعا جاقىن جەردە جاڭا شولۋ دوڭگەلەگىن ورناتۋ جوسپارلانۋدا.
