ۇلكەن الماتى شاتقالىن ارالاۋعا كەتكەن اۋستراليا ازاماتىنىڭ قايتا ورالماعانى بەلگىلى بولدى، دەپ حابارلايدى "ادىرنا" ۇلتتىق پورتالى رەسپۋبليكالىق جەدەل قۇتقارۋ جاساعىنىڭ ءباسپاسوز قىزمەتىنە سىلتەمە جاساپ.
1995 جىلى تۋعان اۋستراليا ازاماتى 21 مامىردا ۇلكەن الماتى شاتقالىنا قاراي كەتكەن. سودان ورالماعان. بۇل تۋرالى پوليتسيا دەپارتامەنتىنە ەر اداممەن بىرگە كەلگەن رەسەي ازاماتى حابارلاعان.
"اۋستراليالىق ازاماتتى سوڭعى رەت ارىپتەستەرى كورگەن. جوعالعان ەر ادامنىڭ دوس قىزىنىڭ ايتۋىنشا، جوعالعان ادام ەكەۋى تۋريستىك ساپارمەن الماتىعا 20 مامىردا كەشكە كەلگەن. ساعات تاڭعى 7-دە تۋريستەر قايتا ۇشىپ كەتۋى كەرەك بولعان. قىز اۋەجايعا جالعىز كەلگەن، سول جەردە ەر ادامدى كەزدەستىرەمىن دەپ ويلاعان. الايدا اۋستراليالىق ازامات سول كۇيى ورالماعان", - دەيدى ۆەدومستۆو.
ءتۋريستى ىزدەۋگە 6 ادامنان تۇراتىن رەسپۋبليكالىق جەدەل-قۇتقارۋ جاساعىنىڭ (رجقج) قۇتقارۋ توبى جانە 1 كينولوگيالىق توپ جىبەرىلدى. 23 ساعات 40 مينۋتتا ولار ىزدەۋگە كىرىستى. 2 ساعات 40 مينۋتتا رجقج قىزمەتكەرلەرى مەن پوليتسيا دەپارتامەنتىنىڭ قىزمەتكەرلەرى عارىش ستانتسياسىنا دەيىن كوتەرىلىپ، بەتكەيلەردى تەكسەردى. سول ماڭداعى ۇلكەن الماتى كولىنىڭ جاعالاۋىن دا ءجىتى قاراپ شىققان.
الايدا اۆستراليالىق ازامات سول كۇيى تابىلماعان. ىزدەۋ شارالارى كەزىندە الماتىداعى اۋا رايى دا قولايسىز بولعان.
"ساعات 10.45-تە ۇلكەن الماتى وزەنىنە قۇتقارۋشىلاردىڭ تاعى ءبىر توبى كەلدى. 10 ادام ساعات 11:15-تە عارىش ستانتسياسىنان ىزدەۋدى جالعاستىردى. قۇتقارۋشىلار ەكى توپقا ءبولىندى: بىرەۋى ايۋساي شاتقالىنا، ەكىنشىسى پروحودنوە شاتقالىنا كەتتى", - دەيدى رجقج ءباسپاسوز قىزمەتى.
"ادىرنا" ۇلتتىق پورتالى
