قازاقستان تاراپى ساۋدا كوركىن قىزدىرىپ، قىتايعا تاۋار ساتۋ ءىسىن جانداندىرماق. وسى ماقساتتا قىتايمەن ساۋدا-ساتتىقتىڭ جاڭا فورماتىن ەنگىزىلەدى. ساۋدا جانە ينتەگراتسيا ءمينيسترىنىڭ ايتۋىنشا، قىتايدىڭ قازاق تاۋارى مەن ونىمىنە دەگەن قۇلشىنىسى جوعارى. ولار قازاقستاندا ساۋدا ايماعىن قۇرىپ، وتاندىق ونىمدەردى قىتايعا تاسىمالداۋعا ىقىلاس تانىتقان، دەپ حابارلايدى "ادىرنا" ۇلتتىق پورتالى.
الىس-بەرىستىڭ تولىسقان، تۇرلەنگەن ءتۇرى حاقىندا ساۋدا جانە ينتەگراتسيا ۆيتسە-ءمينيسترى قايرات تورەباەۆ ءمالىم ەتتى.
«قىتاي پاندەميا ۋاقىتىندا قازاقستان ءۇشىن ەكسپورتتىق قىزىعۋشىلىق تۋدىرعان ەڭ ءىرى نارىقتاردىڭ بىرىنە اينالدى. كوپتەگەن شەتەلدىك كومپانيا قىتايدان كەتتى، ال قىتاي نارىعى قازاقستان ءۇشىن وتە تارتىمدى. بىرىنشىدەن، اۋىل شارۋاشىلىعى. ياعني، ءبىزدىڭ نەگىزگى قىزىعۋشىلىعىمىز – قىتاي ساتىپ الۋشىلارىنىڭ قاجەتتىلىگىن قاناعاتتاندىرۋ. قىتاي ەت وڭدەۋشىلەرى قاۋىمداستىعىمەن كەزدەستىم. وسى كەزدەسۋدە ءبىر قىزىق اپارات بولدى. ەگەر، ءاربىر قىتايلىق كۇندەلىكتى تاعام مولشەرىندە ەت تۇتىنۋدى 50 گراممعا ارتتىرسا، وندا قىتايدىڭ 1 جىلداعى ەت يمپورتى 25 ملن تونناعا ارتادى»، - دەدى ۆيتسە-مينيستر ورتالىق كوممۋنيكاتسيالار قىزمەتىندەگى ءباسپاسوز ءماسليحاتىندا باق وكىلدەرىنىڭ ساۋالىنا وراي.
ونىڭ اتاپ وتۋىنشە، قىتاي اۋماعىندا وڭدەۋشى كاسىپورىندار قۇرىلىسىمەن اينالىساتىن كومپانيامەن كەلىسىمشارت جاسالعان.
«ولار بىزگە قازاقستاندا ايماق قۇرۋدى، وعان قىتايدا تۇتىنىلاتىن ءتۇرلى ونىمدەردى وندىرۋشىلەردى ورنالاستىرۋدى، ەكسپورت الدىنداعى تەكسەرۋ جۇرگىزۋدى ۇسىنادى. زەرتحانالار، تەحنيكالىق رەتتەۋ، بارلىق ليتسەنزيالار سول جەردە بولادى. ياعني، قازاقستان اۋماعىندا ماشينا نە كونتەينەر مورلەنىپ، قىتاي اۋماعىنداعى ساتىپ الۋشىلارعا توقتاۋسىز تەكىزىلەدى. بۇل ساۋدا-ساتتىقتىڭ جاڭا فورماتى. ءبىز ونى قىتايمەن تاجىريبەدەن وتكىزەمىز. ولاردا الەمنىڭ وزگە بىردە-ءبىر ەلىممەن مۇنداي جوق. ءبىز سوعان قول جەتكىزە الدىق. مۇنى قازاقستان ۇكىمەتى تاراپىنان ىلگەرىلەۋشىلىك دەر ەدىم»، - دەدى قايرات تورەباەۆ.
ورايى كەلگەندە ايتا كەتەيىك، وتكەندە قاسىم-جومارت توقاەۆ پەن سي تسزينپين بىرقاتار قۇجاتتارعا قول قويعان ەدى. قۇشاق-قۇشاق قۇجاتتاردىڭ اراسىندا "قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ۆيزالىق تالاپتاردان ءوزارا بوساتۋ تۋرالى كەلىسىم" بار.
قازاقستان ازاماتتارىنىڭ قىتاي اۋماعىندا، قىتاي ازاماتتارىنىڭ قازاقستان اۋماعىندا 30 كۇننەن اسپايتىن مەرزىمگە ۆيزاسىز جۇرۋىنە مۇمكىندىك بەرەتىن قۇجات قاراستىرىلىپ جاتقانىن بۇعان دەيىن حابارلعان. ۇلتتىق اقپارات كەڭىستىگىندە بۇعان دەگەن ءتۇرلى كوزقاراس، الا-قۇلا پىكىر قالىپتاستى.
"ادىرنا" ۇلتتىق پورتالى
