اۋىل - قازاقتىڭ جانى، بولمىسىنىڭ قاينارى، قاسيەتىنىڭ ءبۇتىنى. 26 قاراشادا وتكەن ۇلىقتاۋ ءراسىمى كەزىندە قاسىم-جومارت توقاەۆ اۋىلدى دامىتۋ ماسەلەسى تۋرالى جارلىققا قول قوياتىنىن، سوعان سايكەس ۇكىمەتكە اۋىلدى دامىتۋدىڭ 5 جىلعا ارنالعان ناقتى جوسپارىن ازىرلەۋدى تاپسىراتىنىن حابارلادى. بۇل جايلى "ادىرنا" ۇلتتىق پورتالى جازدى.
"قازىر – سايلاۋداعى جەڭىستى تويلايتىن كەز ەمەس، ايانباي ەڭبەك ەتەتىن كەز. سول سەبەپتى، ارقانى كەڭگە سالماي، بىردەن ىسكە كىرىسۋىمىز كەرەك، بوساڭسۋعا بولمايدى. وسى ورايدا، ەڭ الدىمەن قولعا الاتىن بىرنەشە ماسەلەگە ارنايى توقتالعىم كەلەدى. مەن سايلاۋالدى سوزدەرىمدە اۋىلدى وركەندەتۋ ىسىنە باسا نازار اۋداردىم. بۇگىندە قازاقستان حالقىنىڭ 40 پايىزعا جۋىعى اۋىلدا تۇرادى. "اۋىل – ەل بەسىگى" دەپ حالقىمىز بەكەر ايتقان جوق. سوندىقتان، اۋىلداعى جاعدايدى جاقسارتا الماساق – بارىمىزگە سىن. سول ءۇشىن مەن بۇگىن اۋىلدى دامىتۋ ماسەلەسى تۋرالى جارلىققا قول قويامىن", - دەدى پرەزيدەنت.
پرەزيدەنت وسى قۇجاتتى نەگىزگە الا وتىرىپ، ۇكىمەتكە اۋىلدى دامىتۋدىڭ 5 جىلعا ارنالعان ناقتى جوسپارىن ازىرلەۋدى تاپسىراتىنىن جەتكىزدى.
"بۇل مەنىڭ جاڭا پرەزيدەنتتىك مەرزىمدەگى ءبىرىنشى جارلىعىم بولادى. ۇكىمەت اۋىلدى دامىتۋعا ارنالعان بارلىق جوبانى جۇيەلى تۇردە رەتتەپ، جيناقتاۋعا ءتيىس. سودان كەيىن ماقساتتى تۇردە ءتيىمدى جۇمىس جۇرگىزەمىز", - دەدى قاسىم-جومارت توقاەۆ.
"ادىرنا" ۇلتتىق پورتالى
