جازۋشى-دراماتۋرگ دۋمان رامازان «جۇلدىز» جۋرنالى مەن جازۋشىلار وداعىنىڭ دراماتۋرگيا كەڭەسىندەگى قىزمەتتەرىن اياقتاعانىن مالىمدەدى، دەپ حابارلايدى «ادىرنا» ءتىلشىسى.
«جاڭا ادىلەتتى قازاقستان قۇرامىز دەپ جارياعا جار سالىپ جاتىرمىز عوي. سوعان سەنىپ، قازاقستان جازۋشىلار وداعىنىڭ توراعاسىن سايلاۋ ءادىل وتەتىن شىعار دەپ ويلادىق. قاتەلەسىپپىز. قالاي وتكەنىن وزدەرىڭىز كوردىڭىزدەر... ونى قايتالاپ جاتۋدىڭ ءوزى ارتىق. بولارى بولدى، بوياۋى ءسىڭدى. ار ادامنىڭ ءوز ءومىر ءسۇرۋ داعدىسى، وزىندىك كوزقاراسى، تانىم-تۇسىنىگى، ومىرلىك ۇستانىمى بولادى. ازاماتتىق ابىروي-بەدەلى مەن ادامدىق دارەجە-مارتەبەسى دە سونىمەن ولشەنەدى. سول سەبەپتى دە قازاقستان جازۋشىلار وداعىنداعى بار قىزمەتىمدى تاپسىرىپ بەرىپ، جۇمىستان شىعۋ تۋرالى ارىزىمدى جازىپ كەتتىم»،—دەدى ول.
ايتۋىنشا، جاڭا توراعا مەرەكە قۇلكەنوۆ قايراتكەرگە بۇدان دا جوعارى قىزمەت ۇسىنعان.
«اعامىزعا مىڭ العىس، بۇرىنعى قىزمەتىمنەن دە جوعارى قىزمەت ۇسىندى. راحمەت ايتتىم. جالپى مەرەكە اعامىزبەن كەيىنگى ءبىر جىلدا بىرگە قىزمەت ىستەدىك. ءاي-شاي دەسكەن جوقپىز. اعا-ىنىلىك قارىم-قاتىناس جاسادىق. سوندىقتان دا بولار:
– جاقسىلاپ ويلان! – دەدى.
– ويلاندىم! – دەپ قىسقا قايىردىم. بۇل ار-ۇياتىمنىڭ تاڭداۋى. تۇسىنىستىكپەن قارارسىزدار»،—دەدى جازۋشى.
سونداي-اق دۋمان رامازان ەشكىمگە وكپە-رەنىشىنىڭ جوق ەكەنىن جەتكىزدى.
«بۇنىمەن ءومىر توقتاپ قالمايدى. ادامدا پرينتسيپ بولۋى كەرەك. ەشكىمگە دە وكپە-رەنىشىم جوق. ايتىسىپ-تارتىسپايمىن. ءوز ماقسات-مۇراتىم، وي-جوسپارىم بار. سوعان جەتۋ ءۇشىن تالپىنا بەرەمىن، تىنباي ەڭبەكتەنە بەرەمىن. ءبىر عانا ەسكەرتەرىم: ەشقانداي ينتريگا مەن توپقا قوسىلمايمىن. ەشكىمنىڭ ۇستىنەن ارىزدانبايمىن. ارينە، تۋعانىمداي ارالاساتىن، جاقىن تارتاتىن اعا-باۋىرلارىم، قالامداستارىم، ارالاس-قۇرالاس ادامدارىم بار. سولارمەن بولاشاقتا دا تىعىز قارىم-قاتىناس جاساي بەرەمىن. وداقتاعى قىزمەتىمنەن كەتسەم دە، ادەبيەتتەن كەتپەيمىن عوي. ەڭ باستىسى، باسىمىز امان، دەنىمىز ساۋ بولسىن!
بارشاڭىزعا باق تىلەدىم!»—دەپ تۇيىندەدى ول.
