Jazýshy-dramatýrg Dýman Ramazan «Juldyz» jýrnaly men Jazýshylar odaǵynyń Dramatýrgııa keńesindegi qyzmetterin aıaqtaǵanyn málimdedi, dep habarlaıdy «Adyrna» tilshisi.
«Jańa ádiletti Qazaqstan quramyz dep jarııaǵa jar salyp jatyrmyz ǵoı. Soǵan senip, Qazaqstan Jazýshylar odaǵynyń tóraǵasyn saılaý ádil ótetin shyǵar dep oıladyq. Qatelesippiz. Qalaı ótkenin ózderińiz kórdińizder... Ony qaıtalap jatýdyń ózi artyq. Bolary boldy, boıaýy sińdi. Ár adamnyń óz ómir súrý daǵdysy, ózindik kózqarasy, tanym-túsinigi, ómirlik ustanymy bolady. Azamattyq abyroı-bedeli men adamdyq dáreje-mártebesi de sonymen ólshenedi. Sol sebepti de Qazaqstan Jazýshylar odaǵyndaǵy bar qyzmetimdi tapsyryp berip, jumystan shyǵý týraly aryzymdy jazyp kettim»,—dedi ol.
Aıtýynsha, jańa tóraǵa Mereke Qulkenov qaıratkerge budan da joǵary qyzmet usynǵan.
«Aǵamyzǵa myń alǵys, burynǵy qyzmetimnen de joǵary qyzmet usyndy. Rahmet aıttym. Jalpy Mereke aǵamyzben keıingi bir jylda birge qyzmet istedik. Áı-shaı desken joqpyz. Aǵa-inilik qarym-qatynas jasadyq. Sondyqtan da bolar:
– Jaqsylap oılan! – dedi.
– Oılandym! – dep qysqa qaıyrdym. Bul ar-uıatymnyń tańdaýy. Túsinistikpen qararsyzdar»,—dedi jazýshy.
Sondaı-aq Dýman Ramazan eshkimge ókpe-renishiniń joq ekenin jetkizdi.
«Bunymen ómir toqtap qalmaıdy. Adamda prınıp bolýy kerek. Eshkimge de ókpe-renishim joq. Aıtysyp-tartyspaımyn. Óz maqsat-muratym, oı-josparym bar. Soǵan jetý úshin talpyna beremin, tynbaı eńbektene beremin. Bir ǵana eskerterim: eshqandaı ıntrıga men topqa qosylmaımyn. Eshkimniń ústinen aryzdanbaımyn. Árıne, týǵanymdaı aralasatyn, jaqyn tartatyn aǵa-baýyrlarym, qalamdastarym, aralas-quralas adamdarym bar. Solarmen bolashaqta da tyǵyz qarym-qatynas jasaı beremin. Odaqtaǵy qyzmetimnen ketsem de, ádebıetten ketpeımin ǵoı. Eń bastysy, basymyz aman, denimiz saý bolsyn!
Barshańyzǵa baq tiledim!»—dep túıindedi ol.
