الەۋمەتتىك جەلىدە ەلىمىزدىڭ 10 وقۋشىسى رەسەي اننەكسيالاپ العان قىرىمعا 24 كۇنگە جىبەرىلگەنى قىزۋ تالقىلانعان بولاتىن. استاناداعى «ورىس ءۇيى – روسسوترۋدنيچەستۆو» ۇيىمداستىرعان شاراعا استانا، تاراز جانە شىمكەنت قالالارىنىڭ وقۋشىلارى بارعان. ال وقۋ-اعارتۋ مينيسترلىگى جارىسقا قاتىسۋ جانە ساياحات – اتا-انانىڭ قالاۋىمەن جانە ولاردىڭ كەلىسىمىمەن بولعانىن ايتىپ، اقتالدى.
سوعىس ءجۇرىپ جاتقان ايماقتا بالالارعا قاۋىپ تونسە، وعان كىم جاۋاپ بەرەدى؟ وسى جانە وزگە دە سۇراقتاردى ءماجىلىس دەپۋتاتتارىنان سۇرادىق.
سۇراققا سۇراقپەن جاۋاپ بەرەتىن دەپۋتات
«امانات» پارتياسىنىڭ اتىنان ءماجىلىس دەپۋتاتى بولىپ سايلانعان ماقسات تولىقبايدان «رەسەي باسقىنشىلىعىنداعى ۋكراينا جەرىنە بالالاردىڭ بارۋى قانشالىقتى دۇرىس؟» دەپ سۇرادىق.
- باسقاسىن ايتپاعاندا، سولتۇستىك قازاقستان وبلىسىنداعى سوڭعى جاعدايلاردى بىلەسىزدەر. «ينتەرناتسيونالدىق ەركىن حالىقپىز» دەپ وزدەرىن جاريالاعان وقيعانى كورىپ وتىرمىز. مۇنداي پيعىلداعى توپتار بار. ۇلتتىق قاۋىپسىزدىك كوميتەتى مۇنداي جاعدايدا جاقسى جۇمىس ىستەۋى كەرەك، – دەدى دەپۋتات الىستان وراعىتىپ.
ماسەلەنى تاعى دا ناقتىلاي ءتۇسۋ ءۇشىن «سوعىس ايماعىنداعى قىرىمعا وقۋشىلاردى جىبەرگەنى ءۇشىن كىم جاۋاپ بەرۋى كەرەك؟» دەپ سۇرادىق.
- وعان بايلانىستى مەندە دە سۇراق بار. سوعىس بولىپ جاتقان ايماققا وقۋشىلاردى نەگە جىبەرەدى؟ كىم رۇقسات بەرگەن؟ كىمنىڭ قاۋلىسىمەن قابىلداعان شەشىم. ءبىر ادام وسىعان بايلانىستى جاۋاپكەرشىلىككە تارتىلۋى كەرەك، - دەدى دەپۋتات تاعى دا ناقتى جاۋاپتان تايساقتاپ.
ءمينيستردىڭ ادۆوكاتىنداي دەپۋتات
«رەسپۋبليكا» پارتياسى ارقىلى دەپۋتات بولعان ولجاس قۇسپەكوۆ بولسا، تىپتەن تاڭعالدىردى. ول قىرىمعا وقۋشىلاردى جىبەرۋ تۋرالى شەشىمدى اتا-انالار قابىلداعانىن ايتتى.
- مەنىڭ بىلۋىمشە، حالىقارالىق كونكۋرس بولعان. سول كونكۋستىڭ ناتيجەسىندە بالالار جۇلدەلى ورىن الىپ، سوعان بايلانىستى بالالارعا سىيلىق رەتىندە ارتەككە دەمالىس جولداماسى بەرىلگەن، - دەيدى دەپۋتات قۇسپەكوۆ.
ونىڭ ايتۋىنشا، قازىر قازاقستاندا مۇنداي اشىق كونكۋرستار كوپ. وعان قاتىسۋ، قاتىسپاۋ بالانىڭ اكە-شەشەسىمەن بىرگە اقىلداسىپ قابىلدايتىن تاڭداۋى. بۇل ماسەلەگە وقۋ-اعارتۋ ءمينيسترى كىرىسپەيتىن سياقتى. ينتەرنەتتە بولىپ جاتقان كونكۋرسقا وقۋشى مەن اتا-انا ءوزى شەشىم قابىلداپ، قاتىسادى. جۇلدەلى ورىن ءۇشىن دەمالىس ورىندارىنا جولداما بەرەتىن بولسا، وعان بالاسىن جىبەرۋ، جىبەرمەۋ – ءار اتا-انانىڭ ءوز شەشىمى. سەبەبى كامەلەتكە جاسى تولماعان بالالار ءۇشىن شەشىمدى اتا-انا قابىلدايدى. ەگەر قازاقستاننىڭ ىشىندەگى وليمپيادا نەمەسە كونكۋستار بولاتىن بولسا، وقۋ-اعارتۋ مينيسترلىگى مەن ءبىلىم باسقارمالارى ارنايى ءبىلىم سالاسىنىڭ ادامىن قوسادى. ول بالانىڭ ءتارتىبى مەن قاۋىپسىزدىگىنە قارايتىن بولادى.
بالالاردىڭ ۇتىسىنان گورى قاۋىپسىزدىگىنە، جالپى ءبىلىم سالاسىنا قاتىستى باسشىلاردىڭ ءرولى قانداي بولۋ كەرەگىن سۇراعاندا، دەپۋتات بىلاي دەدى:
- بۇل جەردە بىرەۋدى ايىپتاعان دۇرىس ەمەس شىعار. اتا-انالاردىڭ ارەكەتىن مينيسترلىك بىلمەۋدى دە مۇمكىن. ايتسە دە، بۇل جەردەگى قاۋىپسىزدىك ماسەلەسىنە مىندەتتى تۇردە نازار اۋدارۋىمىز كەرەك. اتا-انالاردىڭ تاڭداۋى ارقىلى قابىلدانعان شەشىم بويىنشا وقۋ-اعارتۋ مينيسترلىگىمەن ەشكىم كەلىسكەن جوق. بىراق بالالار ءبىزدىڭ قازاقستاننىڭ ازاماتى بولعاندىقتان مەملەكەت وعان مىندەتتى تۇردە نازار اۋدارۋ كەرەك. الايدا بۇل ماسەلەدە مينيسترلىكتى ايىپتاۋ دۇرىس ەمەس.
– ەگەر مۇحتار ءابليازوۆ وسىنداي كونكۋرس ۇيىمداستىرىپ، بالالاردى فرانتسياعا شاقىرسا، وعان قۇزىرلى ورگان جول بەرە مە؟
– مەنىڭ بىلۋىمشە، قازىر شەكتەۋ قويا المايدى. ول ءسىز ايتقان ادام بولسىن، نەمەسە قىرىمعا اپاراتىن ۇيىم بولسىن. بۇل تەك اتا-انانىڭ تاڭداۋىنداعى شارۋا بولىپ سانالادى. ويتكەنى ينتەرنەت اشىق. الەۋمەتتىك جەلى ارقىلى جاريالاعان كونكۋرسقا قاتىسۋ، قاتىسپاۋدى اتا-انالار وزدەرى شەشەدى. بۇل جەردە وقۋ-اعارتۋ مينيسترلىگىنىڭ تىكەلەي كىناسى جوق.
– ءسىز مينيسترلىككە لوببي بولىپ وتىرعان جوقسىز با؟
– جوق. وبەكتيۆتى پىكىر ءبىلدىرىپ وتىرمىن. قىرىمعا بارعان وقۋشىلاردان بولەك جازدا نەشە ءتۇرلى لاگەرلەر جۇمىس ىستەيدى. مەن ونى جاقسى بىلمەۋىم مۇمكىن. سودان كەيىن ينتەرنەتتەن ىزدەيمىن.
– ءسىز ءوز بالاڭىزدى قىرىمعا دەمالىسقا جىبەرەر مە ەدىڭىز؟
– جوق، جىبەرمەس ەدىم.
– نەگە؟
– مەن قازاقى كوزقاراستا بولعاندىقتان وندا جىبەرمەيمىن، - دەدى دەپۋتات قۇسبەكوۆ.
ءبىز سۇراق قويعان دەپۋتاتتار ماسەلەنى ناقتىلاماي، وسىلاي سىرعىتپا جاۋاپپەن قۇتىلعانداي بولدى. بايقاۋىمىزشا، دەپۋتات مىرزالار قازاقستان وقۋشىلارى قىرىم تۇرماق، سۋدان مەن تاياۋ شىعىسقا دا بارىپ جاتسا دا، قىڭق ەتەر ءتۇرى جوق. جاۋاپتارى «ءويتۋ كەرەك ەدى»، «ءبۇيتۋ كەرەك ەدى» دەگەننەن اسپايدى. كىم ىستەيدى؟ پارتيا قايدا، پارتيا ۇسىنعان دەپۋتات قايدا؟
ايتپەسە، الەمدىك اقپارات ايدىنىندا انە-مىنە قىرىم ۋكرايناعا قايتارىلادى دەگەن حابار تاراعان كەزدە بالالاردى سوعىس ايماعىنا جىبەرۋ دابىلدىڭ ۇلكەنى بولسا كەرەك ەدى. دەپۋتاتتار مينيسترلەر مەن ءتيىستى كوميتەت وكىلدەرىن شاقىرىپ، جاۋاپكەرشىلىك تالاپ ەتەر ەدى...
سەرىك جولداسباي
"ادىرنا" ۇلتتىق پورتالى
