سەنات توراعاسى: "ادىلەتتى قازاقستان قۇرامىز، دەپۋتاتتىق كورپۋس ساپالىق تۇرعىدان وزگەرەدى"

5121
Adyrna.kz Telegram

سەنات توراعاسى ماۋلەن اشىمباەۆ قازاقستان پرەزيدەنتىن سالتاناتتى ۇلىقتاۋ ءراسىمى تۋرالى ءوز پىكىرىن ءبىلدىردى، دەپ جازادى "ادىرنا" ۇلتتىق پورتالى. 

"مەملەكەت باسشىسى ءوزىنىڭ جەتى جىلدىق قىزمەتىنە رەسمي تۇردە كىرىستى. بۇل ەلىمىزدىڭ ساياسي ومىرىندەگى ايتۋلى وقيعا ەكەنى ءسوزسىز. وتكەن سايلاۋدا ازاماتتارىمىز قاسىم-جومارت كەمەلۇلىنا زور سەنىم ءبىلدىرىپ، ادىلەتتىلىككە تابان تىرەيتىن مەملەكەت، ەكونوميكا جانە قوعام قۇرۋ باعدارلاماسىن قىزۋ قولداعانى بەلگىلى. پرەزيدەنتىمىز ۇلتىمىزدىڭ وسى ءۇمىتىن اقتاۋ ءوزىنىڭ الداعى باستى مىندەتى بولاتىنىن جاريالادى. سونىمەن قاتار، سايلاۋ الدىندا بەرىلگەن ۋادەلەردى ىسكە اسىرۋعا جول اشاتىن باستاپقى ءارى ناقتى جۇمىس باعدارلارىن ايقىنداپ كورسەتتى. پرەزيدەنتىمىز ءوز سوزىندە زاڭ الدىندا ءبارىنىڭ تەڭ بولۋى – مەملەكەتىمىزدىڭ ۇزاق مەرزىمدى دامۋىنىڭ نەگىزگى شارتى ەكەنىن قاداپ ايتتى. وسى جولدا ەلدەن زاڭسىز شىعارىلعان بارلىق اكتيۆتى ەلگە قايتارۋ ماڭىزدى مىندەتكە اينالۋدا", - دەپ جازدى ماۋلەن اشىمباەۆ.

بۇل ءۇشىن زاڭسىز شەتەل اسقان كاپيتالدى قايتارۋعا قاجەتتى راسىمدەردى رەتتەيتىن زاڭ جوباسى ازىرلەنەتىنىن جەتكىزدى.

"سونداي-اق پرەزيدەنتىمىز وڭىرلەردى، ونىڭ ىشىندە اۋىلدارىمىزدى وركەندەتۋگە ايرىقشا كوڭىل ءبولىپ وتىر. وسىعان بايلانىستى قاسىم-جومارت كەمەلۇلىنىڭ جاڭا پرەزيدەنتتىك مەرزىمدەگى ءبىرىنشى جارلىعى اۋىلدى دامىتۋ ماسەلەسىن شەشۋگە ارنالدى. سونىمەن بىرگە اۋقىمدى يندۋستريالاندىرۋ، ينفراقۇرىلىمداردى سالۋ جانە جاڭعىرتۋ ءىسى دە تىڭ سەرپىنمەن قولعا الىنادى. مەملەكەت باسشىسى ءوز سوزىندە كونستيتۋتسياعا سايكەس بيلىك تارماقتارى تۇگەل جاڭعىرتىلاتىنىن ايتتى. وسىعان سايكەس الداعى جىلدىڭ 14 قاڭتارىندا سەنات دەپۋتاتتارىنىڭ سايلاۋى وتەدى. بۇل ءبىزدىڭ دەپۋتاتتىق كورپۋستىڭ ساپالىق تۇرعىدان وزگەرىپ، ءوز جۇمىسىن جاڭا مىندەتتەر اياسىندا لايىقتى جالعاستىرۋىنا مۇمكىندىك بەرەدى. ادىلەتتى قازاقستاندى قۇرۋ – بارشامىزدىڭ ورتاق ماقساتىمىز. وسى جانە الدا جاريالاناتىن باسقا دا باستامالار مەن مىندەتتەردى زاڭنامالىق تۇرعىدان ساپالى ءارى ۋاقتىلى قامتاماسىز ەتۋ سەناتتىڭ الدىنداعى باستى مىندەتى بولىپ قالا بەرەدى",- دەدى سەنات توراعاسى.

"ادىرنا" ۇلتتىق پورتالى

پىكىرلەر