ارمەنيا پرەمەر-ءمينيسترى نيكول پاشينيان جاھاندىق جانە وڭىرلىك وزگەرىستەر اياسىندا ارمەنيا مەن ازەربايجاننىڭ ورتاق مۇددەلەر بار ەكەنىن جانە وڭتۇستىك كاۆكاز ەلدەرىنىڭ تاعدىرلارى ءوزارا بايلانىستى ەكەنىن تۇسىنە باستاعانىن ايتتى. بۇل تۋرالى ول پاريج بەيبىتشىلىك فورۋمىنىڭ 8-سەسسياسى اياسىندا وتكەن «كوشباسشىلىق توعىسىندا» اتتى پىكىرتالاس بارىسىندا مالىمدەدى، دەپ حابارلايدى «ادىرنا» ءتىلشىسى.
«بالكىم، ءبىز وڭتۇستىك كاۆكاز ەلدەرىنىڭ تاعدىرلارى ءوزارا بايلانىستى ەكەنىن جانە ونداعان جىلدار بويعى جاۋلاسۋدان كەيىن بۇل شىندىق ءبىز ءۇشىن ايقىنىراق بولىپ كەلە جاتقانىن تۇسىندىك. ءبىز تاۋەلسىزدىك، ەگەمەندىك جانە مەملەكەتتىلىكتى نىعايتۋدىڭ ورتاق مۇددە ەكەنىن ۇعىنا باستادىق. تاريح كورسەتكەندەي، وسىلاي ارەكەت ەتۋ ەكى تاراپقا دا ءتيىمدى»، — دەدى ول.
ارمەنيا پرەمەرى ازەربايجان مەن ارمەنيانىڭ تاۋەلسىزدىك تاريحىنا دا توقتالدى.
«ايتپاقشى، حح عاسىردىڭ باسىندا ءبىز بىرىمىزدەن كەيىن ءبىرىمىز ەگەمەندىك الدىق. 1918 جىلى تاۋەلسىزدىككە قول جەتكىزىپ، بىرنەشە جىلدان سوڭ ونى بىرگە جوعالتتىق. 1991 جىلى دا تاۋەلسىزدىكتى قاتار الدىق. مۇمكىن، ۋاقىت وتە كەلە تاۋەلسىزدىگىمىزگە ورتاق قاۋىپ بار ەكەنىن تۇسىنگەن شىعارمىز. سوندىقتان ءبىز مەملەكەتتەرىمىزدىڭ دامۋى مەن تاۋەلسىزدىگىمىزدى، ەگەمەندىگىمىزدى قورعاۋعا باعىتتالعان كۇن تارتىبىنە نازار اۋداردىق. مەنىڭ ويىمشا، بۇل وتە ماڭىزدى فاكتور، بىراق ازەربايجان تاراپى بۇل پىكىردى ءدال وسىلاي باعالاي ما، جوق پا، ول جاعىنا سەنىمدى ەمەسپىن»، — دەدى پاشينيان.
