Äleumettık jelıde elımızdıŋ 10 oquşysy Resei anneksiialap alǧan Qyrymǧa 24 künge jıberılgenı qyzu talqylanǧan bolatyn. Astanadaǧy «Orys üiı – Rossotrudnichestvo» ūiymdastyrǧan şaraǧa Astana, Taraz jäne Şymkent qalalarynyŋ oquşylary barǧan. Al Oqu-aǧartu ministrlıgı jarysqa qatysu jäne saiahat – ata-ananyŋ qalauymen jäne olardyŋ kelısımımen bolǧanyn aityp, aqtaldy.
Soǧys jürıp jatqan aimaqta balalarǧa qauıp tönse, oǧan kım jauap beredı? Osy jäne özge de sūraqtardy Mäjılıs deputattarynan sūradyq.
SŪRAQQA SŪRAQPEN JAUAP BERETIN DEPUTAT
«Amanat» partiiasynyŋ atynan Mäjılıs deputaty bolyp sailanǧan Maqsat Tolyqbaidan «Resei basqynşylyǧyndaǧy Ukraina jerıne balalardyŋ baruy qanşalyqty dūrys?» dep sūradyq.
- Basqasyn aitpaǧanda, Soltüstık Qazaqstan oblysyndaǧy soŋǧy jaǧdailardy bılesızder. «İnternasionaldyq erkın halyqpyz» dep özderın jariialaǧan oqiǧany körıp otyrmyz. Mūndai piǧyldaǧy toptar bar. Ūlttyq qauıpsızdık komitetı mūndai jaǧdaida jaqsy jūmys ısteuı kerek, – dedı deputat alystan oraǧytyp.
Mäselenı taǧy da naqtylai tüsu üşın «Soǧys aimaǧyndaǧy Qyrymǧa oquşylardy jıbergenı üşın kım jauap beruı kerek?» dep sūradyq.
- Oǧan bailanysty mende de sūraq bar. Soǧys bolyp jatqan aimaqqa oquşylardy nege jıberedı? Kım rūqsat bergen? Kımnıŋ qaulysymen qabyldaǧan şeşım. Bır adam osyǧan bailanysty jauapkerşılıkke tartyluy kerek, - dedı deputat taǧy da naqty jauaptan taisaqtap.
MİNİSTRDIŊ ADVOKATYNDAI DEPUTAT
«Respublika» partiiasy arqyly deputat bolǧan Oljas Qūspekov bolsa, tıpten taŋǧaldyrdy. Ol Qyrymǧa oquşylardy jıberu turaly şeşımdı ata-analar qabyldaǧanyn aitty.
- Menıŋ bıluımşe, halyqaralyq konkurs bolǧan. Sol konkustyŋ nätijesınde balalar jüldelı oryn alyp, soǧan bailanysty balalarǧa syilyq retınde Artekke demalys joldamasy berılgen, - deidı deputat Qūspekov.
Onyŋ aituynşa, qazır Qazaqstanda mūndai aşyq konkurstar köp. Oǧan qatysu, qatyspau balanyŋ äke-şeşesımen bırge aqyldasyp qabyldaityn taŋdauy. Būl mäselege Oqu-aǧartu ministrı kırıspeitın siiaqty. İnternette bolyp jatqan konkursqa oquşy men ata-ana özı şeşım qabyldap, qatysady. Jüldelı oryn üşın demalys oryndaryna joldama beretın bolsa, oǧan balasyn jıberu, jıbermeu – är ata-ananyŋ öz şeşımı. Sebebı kämeletke jasy tolmaǧan balalar üşın şeşımdı ata-ana qabyldaidy. Eger Qazaqstannyŋ ışındegı olimpiada nemese konkustar bolatyn bolsa, Oqu-aǧartu ministrlıgı men bılım basqarmalary arnaiy bılım salasynyŋ adamyn qosady. Ol balanyŋ tärtıbı men qauıpsızdıgıne qaraityn bolady.
Balalardyŋ ūtysynan görı qauıpsızdıgıne, jalpy bılım salasyna qatysty basşylardyŋ rolı qandai bolu keregın sūraǧanda, deputat bylai dedı:
- Būl jerde bıreudı aiyptaǧan dūrys emes şyǧar. Ata-analardyŋ äreketın ministrlık bılmeudı de mümkın. Äitse de, būl jerdegı qauıpsızdık mäselesıne mındettı türde nazar audaruymyz kerek. Ata-analardyŋ taŋdauy arqyly qabyldanǧan şeşım boiynşa Oqu-aǧartu ministrlıgımen eşkım kelısken joq. Bıraq balalar bızdıŋ Qazaqstannyŋ azamaty bolǧandyqtan memleket oǧan mındettı türde nazar audaru kerek. Alaida būl mäselede ministrlıktı aiyptau dūrys emes.
– Eger Mūhtar Äbliazov osyndai konkurs ūiymdastyryp, balalardy Fransiiaǧa şaqyrsa, oǧan qūzyrly organ jol bere me?
– Menıŋ bıluımşe, qazır şekteu qoia almaidy. Ol sız aitqan adam bolsyn, nemese Qyrymǧa aparatyn ūiym bolsyn. Būl tek ata-ananyŋ taŋdauyndaǧy şarua bolyp sanalady. Öitkenı internet aşyq. Äleumettık jelı arqyly jariialaǧan konkursqa qatysu, qatyspaudy ata-analar özderı şeşedı. Būl jerde oqu-aǧartu ministrlıgınıŋ tıkelei kınäsı joq.
– Sız ministrlıkke lobbi bolyp otyrǧan joqsyz ba?
– Joq. Obektivtı pıkır bıldırıp otyrmyn. Qyrymǧa barǧan oquşylardan bölek jazda neşe türlı lagerler jūmys ısteidı. Men ony jaqsy bılmeuım mümkın. Sodan keiın internetten ızdeimın.
– Sız öz balaŋyzdy Qyrymǧa demalysqa jıberer me edıŋız?
– Joq, jıbermes edım.
– Nege?
– Men qazaqy közqarasta bolǧandyqtan onda jıbermeimın, - dedı deputat Qūsbekov.
Bız sūraq qoiǧan deputattar mäselenı naqtylamai, osylai syrǧytpa jauappen qūtylǧandai boldy. Baiqauymyzşa, deputat myrzalar Qazaqstan oquşylary Qyrym tūrmaq, Sudan men Taiau Şyǧysqa da baryp jatsa da, qyŋq eter türı joq. Jauaptary «öitu kerek edı», «büitu kerek edı» degennen aspaidy. Kım ısteidı? Partiia qaida, partiia ūsynǧan deputat qaida?
Äitpese, älemdık aqparat aidynynda äne-mıne Qyrym Ukrainaǧa qaitarylady degen habar taraǧan kezde balalardy soǧys aimaǧyna jıberu dabyldyŋ ülkenı bolsa kerek edı. Deputattar ministrler men tiıstı komitet ökılderın şaqyryp, jauapkerşılık talap eter edı...
Serık Joldasbai
"Adyrna" ūlttyq portaly
Ūqsas jaŋalyqtar
