«QAZSPORT» تەلەارناسىنىڭ ديرەكتورى پاۆەل تسىبۋلين باستالعالى تۇرعان جاڭا تەلەماۋسىم تۋراسىندا سۇحبات بەردى.
- الدىمەن، ەڭ ماڭىزدىلارىنا توقتالساڭىز...
2 ناۋرىزدان باستاپ «QAZSPORT» تەلەارناسى ەفيرىندە ەڭ ۇزدىك بەس ۇلتتىق ەۋروپالىق چەمپيوناتتى ء(ار كەزەڭدە ءار چەمپيوناتتان ءبىر ماتچتان) كورسەتە باستايدى. بۇل دەگەنىڭىز، جانكۇيەرلەر ءار دەمالىس كۇندەرىندە يتاليا، يسپانيا، انگليا، گەرمانيا جانە فرانتسيادان بەس ماتچتان كورەدى دەگەن ءسوز. تارنسلياتسيانى سەنبى، 2 ناۋرىز ساعات 23:00-دە يتاليالىق ا سەرياسىنداعى «ميلان» – «ساسسۋولو» ماتچىنان باستايمىز. بۇل ويىن اياقتالعان سوڭ ساعات 01:00-دە فرانتسياداعى «انجە» – «موناكو» تارتىسىنا بىردەن اۋىسامىز. ال، جەكسەنبى، 3 ناۋرىز كۇنى ساعات 20:00-دە انگليا پرەمەر-ليگاسىنىڭ ورتالىق ماتچتارىنىڭ ءبىرى «فۋلحەم» - «چەلسي» كورسەتىلەدى. ساعات 23:00-دە جانكۇيەرلەر نەمىس بۋندەسليگاسىنىڭ ويىنى «ۆولفسبۋرگ» - «ۆەردەر» تارتىسىن تاماشالاي الادى. ءارى قاراي جەكسەنبىنىڭ دۇيسەنبىگە قاراعان تۇنىندە ساعات 01:45-تە يسپانيالىق لا-ليگادان «ۆالەنسيا» – «اتلەتيك» (بيلباو) ماتچىن قاراۋعا مۇمكىندىك بار.
توپ-5 ماتچتى كورسەتۋدى جوسپارلاۋداعى باستى ماقساتىمىز – بۇل ماتچتار قازاقستاندىق كونتەنتكە قوسىلماۋى كەرەك. بۇل جەردە الدىمەن (جاقىن كۇندەرى), ۋنيۆەرسيادا مەن قحل پلەي-وفف كەزەڭىندەگى «بارىس» ماتچتارىنىڭ ترانسلياتسياسى ماڭىزدى ەكەنىن ەسكەرۋ قاجەت. حوككەي تارتىستارىنىڭ بارلىعى تىكەلەي ەفيردە تاراتىلادى، بۇل ءتىپتى، تالقىعا دا سالىنبايدى. «بارىس» جانە ونىڭ جانكۇيەرلەرى ءۇشىن ءبىز بارلىق چەمپيوناتتاردى تاراتۋعا دايىنبىز. مىسالى، 2 ناۋرىز كۇنى ساعات 20:00-دە «بارىستىڭ» نيجني نوۆگورودتاعى ماتچى كورسەتىلەدى. نەگىزى ءدال وسى ۋاقىتتا اپل «مانچەستەر يۋنايتەد» - «ساۋتگەمپتون» ويىنىن كورسەتۋگە دە بولاتىن ەدى، بىراق بۇل ماتچ حوككەيگە اۋىسادى.
- بۇل كونتەنتتى ساتىپ العان قۇقىق يەلەرىمەن جاسالعان تەلەۆيزيالىق كەلىسىمشارتتا قانداي ەرەكشەلىكتەر بار؟
وزدەرىڭىز بايقاعانداي، بۇل جاي كەلىسىمشارت ەمەس. «Setanta» كومپانياسىمەن كەلىسىمشارت جاساسۋ ۇزاققا سوزىلدى. قازىر جۇمىستىڭ قالاي وربۋىنە بايلانىستى ءبىراز جايتتار بار: الدىمەن، كەلىسىمشارتتى وسى كۇزدە جالعاستىرامىز با دەگەن ماسەلە. ەگەر ويىمىز ءبىز جوسپارلاعانداي ىسكە اسسا، وندا بۇل ماتچتاردى كەلەسى ماۋسىمدا دا كورسەتۋىمىز بەك مۇمكىن. مۇندا بارلىعى ءبىر-ءبىرىمىن تىعىز بايلانىستى: ماتچتاردى تاڭداۋ، كورسەتىلىم ۋاقىتى، جارناماعا قاتىستى سۇراقتار جانە ت.ب. مىسالى، كەلىسىمشارتقا سايكەس، ءبىز اتالمىش ويىنداردى تەك تىكەلەي ەفيردە جانە بەلگىلەنگەن ۋاقىتتا عانا كورسەتە الامىز (ويىنداردى تڭداۋعا دا قۇقىعىمىز جوق). سوندىقتان، ەڭ ۇزدىك ماتچتاردان كورسەتىلىم جاساۋعا ەش قۇقىعىمىز جوق. ويىنداردىڭ جارتىسى توپ قۇرامالاردىڭ قاتىسۋىمەن، جارتىسى ورتاشا بولادى.
- وسى كونتەنتتىڭ قۇقىق يەسىمەن كەلىسىم بارىسىندا قانداي ماڭىزدى كەلىسىمدەر بار؟
- بۇل ءبىر كۇندە وتىرىپ قول قويا سالاتىن كەلىسسوزدەر ەمەس! «Setanta» كومپانياسىمەن كەلىسىمشارت جاساسۋ ۇزاققا سوزىلدى. ماۋسىم سوڭىنا دەيىنگى جۇمىسىمىزعا قاراي كۇزدە بۇل سەرىكتەستىكتى جالعاستىرۋ جايى انىقتالاتىن بولادى. مىسالى، كەلىسىمشارت بويىنشا ءبىز ماتچ تاڭداۋ قۇقىعىنا نەمەسە ونىڭ ۋاقىتىن وزگەرتىپ كورسەتۋگە مۇمكىندىگىمىز جوق. ارينە، مەن كەلىسىمشارتتىڭ بارلىعىن ايتا المايمىن. بىراق، اتالعان كونتەنتتى ساتىپ الۋ بارىسىندا كوپ قاراجات جۇمسامادىق. بۇل وسى كەلىسسوزدەردەگى ەڭ باستى ماسەلە. سەبەبى ءبىز سالىق تولەۋشىلەردىڭ قاراجاتىن وڭدى-سولدى جۇمساي المايمىز.
- ءبىر ۇلكەن جوبانى ەفيرگە شىعارىپ، ەكىنشىسىنەن ايىرىلدىق...
- UFC-گە قاتىستى بەلگىلى ءبىر سەبەپتەرگە بايلانىستى /تەلەارنانىڭ تاراپىنان ەمەس/ جەكپە-جەكتەردى كورسەتۋدى توقتاتتىق. وكىنىشكە قاراي، ەكى تاراپتىڭ كەلىسىمىمەن UFC ترانسلياتسيالارىن وتكىزۋ تۋرالى كەلىسىمشارت بۇزىلدى. الداعى ۋاقىتتا كەلىسسوزدەر جالعاسىپ الەمدىك پروموۋشەندى تەلەارنامىزعا قايتا قوسامىز دەگەن ۇمىتتەمىز. ايتا كەتەيىك، مۇنداي تۇسىنىكسىز جايتقا تەك «QAZSPORT» تەلەارناسى عانا ەمەس، الەمنىڭ باسقا ەلدەرىنىڭ ارنالارى دا تاپ بولدى.
- ءححىح قىسقى ۋنيۆەرسيادا ويىندارىنىڭ دا ماڭىزدىلىعىن ايتا كەتكەن ءجون شىعار؟
- ءيا، ءبىز ونى 3-12 ناۋرىز ارالىعىندا كورسەتەمىز. ۋنيۆەرسيادا بارىسىندا 60-تان استام تەلەكورسەتىلىم جۇرگىزىلەتىن بولادى. ءبىزدىڭ ماقساتىمىز – بارلىق قازاقستاندىق سپورتشىلاردىڭ ونەرىن كورسەتۋ. «QAZSPORT» تەلەارناسى الەمدەگى ەڭ باستى 5 كورسەتىلىم تاراتۋشىلارى قاتارىندا. بۇل جولى 56 مەملەكەتتىڭ قۇرامالارى قاتىسىپ، 11 سپورت ءتۇرى بويىنشا 76 مەدال ساراپقا سالىنادى. قازاق ەلىنىڭ نامىسىن 95 ستۋدەنت قورعاماق.
ەستەرىڭىزگە سالا كەتەيىك، الماتىدا وتكەن ۋنيۆەرسيادادا قورجىنعا 11 التىن، 8 كۇمىس، 17 قولا مەدال سالعان سپورتشىلارىمىز كورشى ەلدە 2 جىل بۇرىنعى جەتىستىگىن قايتالايدى، دەپ سەنەمىز.
سونداي-اق، جاڭا ماۋسىمدا ۋەفا چەمپيوندار ليگاسى مەن ەۋروپا ليگاسىنىڭ كورسەتىلىمى جالعاسىن تابادى. سونىمەن قاتار، باسكەتبولدان ەل چەمپيوناتىنىڭ بىرنەشە ويىندارى كورسەتىلەتىن بولادى. بۇل «QAZSPORT» ارناسىنىڭ تاريحىندا العاش رەت بولماق. نەگە تەك بىرنەشە؟ سەبەبى، كلۋبتاردىڭ سپورت ارەنالارى كورسەتىلىم جۇرگىزۋگە، تەحنيكالىق تالاپتارعا ساي كەلمەيدى. ءبىز ءتۇرلى تۇسكە ارلەنگەن جانە بوس سپورت زالدارىنان ەفيرگە شىعا المايمىز عوي.
- فۋتبولدان قازاقستان پرەمەر-ليگاسى ويىندارىنىڭ كورسەتىلىمى نە بولماق؟
- مەن ءدال قازىر ەل چەمپيوناتىن كورسەتەمىز دەپ ناقتى ايتا المايمىن. ءبىز ءالى كۇنگە دەيىن قازاقستاننىڭ كاسىپقوي فۋتبول ليگاسىمەن كەلىسىمگە كەلە الماي كەلەمىز. سەبەبى، ولار بىزدەن تۆ قۇقىق ءۇشىن قارجى سۇراپ وتىر. بىراق، ءبىز نە ءۇشىن تولەيمىز؟ مىسالى، ەۋروپانىڭ توپ-5 چەمپيوناتىنىڭ ويىندارىنا قۇقىق العان كەزدە بىزگە ءبارى دايىن كەلەدى. ءبىز تەك ەفيردەن كورسەتىپ، جۇرگىزەمىز. ال قازاقستاندىق ويىنداردى كورسەتكەندە ءبىز ءوزىمىز ءتۇسىرىپ، ونىڭ ۇستىنە ءار وبلىس، قالاعا ىسكەرلىك ساپارعا شىعىپ جانە سول اتقارعان جۇمىستى وڭدەۋىمىز كەرەك. مۇنىڭ بارلىعى كوپ قاراجاتتى تالاپ ەتەدى. ويلاپ قاراساڭىز، ءبىز مەملەكەتتىك قارجىنى وسى جۇمىستارعا جۇمساپ، ونىڭ ۇستىنە سول ءۇشىن اقشا تولەۋىمىز كەرەك. سونداي-اق، كاسىپقوي فۋتبول ليگاسىنىڭ ءوزى مەملەكەتتىك بيۋدجەتكە قاراپ وتىر. دەمەك، بۇل دەگەنىڭىز، مەملەكەتتىك اقشانى ء(بىزدىڭ ارنا) ءدال سونداي بيۋدجەتكە قاراپ وتىرعان مەكەمەگە (قكفل) سالۋ. سوندىقتان، بۇل نۇسقا ءبىزدى قاناعاتتاندىرمايدى. شىنىمدى ايتسام، شەتەلدىك چەمپيوناتتاردىڭ كورسەتىلىمىن العاننان، قكفل-مەن كەلىسسوز جۇرگىزۋ قيىن بولىپ تۇر. ءبىز ءوز تاراپىمىزدان ەل چەمپيوناتىنىڭ 1/3 بولىگىن ءوز قاراجاتىمىزبەن كورسەتۋگە دايىن ەكەنىمىزدى جاريالايمىن. ليگاعا بۇدان ارتىق نە كەرەك؟ ويىندار كورسەتىلەدى، فۋتبول دامىپ جاتىر. ال، قكفل-گە قاراجات جۇمساۋدىڭ قاجەتى جوق. مەنىڭشە، ءبىزدىڭ ۇستانىم تۇسىنىكتى ءارى ناقتى.
