Tájikstannyń prezıdenti Emomalı Rahmon óziniń Hatlon oblysyna sapary kezinde qajylardy synǵa alyp, ýmra men qajylyqty oryndaýdy "elikteý jáne fanatızm" dep atady. Basshynyń aıtýynsha, sońǵy kezderi qajylyqqa barý otbasylyq básekege, jarysqa aınalǵan, dep habarlaıdy "Adyrna" ulttyq portaly islamnews saıtyna silteme kórsete otyryp.
"Sońǵy kezderi qajylyq, onyń ishinde kishi qajylyq elimizdiń keı aımaqtaryndaǵy turǵyndardyń arasynda mindetti is-sharaǵa, tipti otbasylyq jarysqa, týrızm men saýdanyń bir túrine aınalǵan", - dedi Emomalı Rahmon.
Tájikstan basshysy memleketindegi áleýmettik kórsetkishterge ıek artyp, qajylyqqa baratyndardyń bir aýyq turmys-tirshiligin de eske alyp qoıýǵa shaqyrdy. Prezıdenttiń pikirinshe, qajylyqqa barardan buryn halqy jesir men jetimge jar bolyp, bar qarjysyn bala tárbıesi men bilimine shashqan durys.
"Kórsetkishterge súıensek, qajylyqqa baratyn, tipti ózimen birge sábıler men jasóspirimderdi de ala ketetin adamdar qajylyqtyń rásimi neden quralatynyn, otbasylarynyń, balalarynyń, týystarynyń turmys-tirshiligi qandaı ekendigi týraly oılanbaıdy", – dep atap ótti ol.
"Qajylyqqa barardan buryn jerlesterimiz osy máseleler men qazirgi zamannyń ahýaly jaıly azdap oı qozǵap, mańdaı termen tapqan aqshasyn balanyń tárbıesi men oqýyna jumsap, ómirdegi qajettilikterdi qanaǵattandyryp, jetimderge, múgedekterge, muqtajdarǵa, kedeılerge kómektesip qana qajylyqqa barý kerek ekenin taǵy bir márte atap ótemin", - dep túıindedi Tájikstan prezıdenti.
Esterińizge sala keteıik, Tájikstannyń "Azattyǵy" 2017 jyly Emomalı Rahmonnyń álemniń eń yqpaldy 500 musylmany tizimine kirgeni jaıly jazǵan edi. Tájikstan turǵyndarynyń shamamen 99 paıyzyn musylmandar quraıdy.
"Adyrna" ulttyq portaly
