اۋعانستاننان كوشىپ كەلگەن 35 ادامنان تۇراتىن ءتورت وتباسى اقمولا وبلىسىنا قونىستاندىرىلۋدا دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ.
«بيىل 258 ادامعا كۆوتا بولىنگەن، ءبىز كۆوتانى 85 پايىزعا عانا يگەردىك. كەلگەندەر كوكشەتاۋ قالاسىندا، اتباسار، ساندىقتاۋ جانە بۋراباي اۋداندارىندا ورنالاسقان. ولار بارلىق راسىمدەردەن ءوتىپ، قانداس مارتەبەسىن الادى»، - دەپ ءتۇسىندىردى د.احمەتجانوۆا.
زاڭ شەڭبەرىندە قونىس اۋدارۋشىلارعا وتباسىنىڭ ءاربىر مۇشەسىنە 70 ايلىق ەسەپتىك كورسەتكىشتەن (200 مىڭ تەڭگەدەن استام) بىرجولعى جاردەماقى قاراستىرىلعان، سونداي-اق جىل ىشىندە ولار اي سايىن 15-تەن 30 ايلىق ەسەپتىك كورسەتكىشكە دەيىن تۇرعىن ءۇيدى جالداۋ جانە كوممۋنالدىق قىزمەتتەردى وتەۋگە قاراجات الاتىن بولادى. باسقارما باسشىسىنىڭ ايتۋىنشا، وتباسى مۇشەلەرى قونىستانىپ، جۇمىس تابادى.
«مىسالى، كوكشەتاۋعا قۇرامىندا توعىز ادام بار وتباسى كەلدى. ولار «نوۆوپەك» جشس-دە جۇمىس ىستەيتىن بولادى. ولار قر ازاماتى مارتەبەسىن العان كەزدە ەلىمىزدىڭ باسقا ازاماتتارىمەن تەڭ دارەجەدە ءومىر سۇرەتىن بولادى»، - دەپ اتاپ ءوتتى د.احمەتجانوۆا.
ول اتاپ وتكەندەي، تاۋەلسىزدىكتىڭ 30 جىلى ىشىندە اقمولا وبلىسىنا تۇراقتى تۇرۋعا 8983 قانداس كەلدى، ونىڭ قۇرامىندا 40126 ازامات بار. اعىمداعى جىلى وڭىرگە بارلىعى 89 وتباسى كوشىپ كەلدى، ولاردىڭ قۇرامىندا 157 ادام بار. تالداۋ كورسەتكەندەي، وتباسىلاردىڭ 47,9 پايىزى موڭعوليادان، 29,5 پايىزى وزبەكستاننان، 12,1 پايىزى قىتايدان كەلگەن.
“ادىرنا” ۇلتتىق پورتالى
