اۋعانستاننىڭ بۇرىنعى پرەزيدەنتى اشراف عاني اۋعانستاننان قاشىپ كەتكەن سەبەبىن ايتتى، دەپ حابارلايدى “ادىرنا” ۇلتتىق پورتالى.
2021 جىلى 15 تامىزدا تالىپتەر كابۋلعا كىرىپ، اقىرى اۋعانستاندى باقىلاۋىنا الدى. سول كەزدە ەلدەن قاشىپ كەتكەن عاني سىنعا ۇشىرادى.
“كەتۋ سەبەبىم، تالىپتەر مەن ولاردىڭ جاقتاستارىنا اۋعانستان پرەزيدەنتىنىڭ تاعى دا نامىسىنا ءتيىپ، ونى ۇكىمەتتىڭ لەگيتيمدىلىگى تۋرالى قۇجاتقا قول قويۋعا ماجبۇرلەۋگە جول بەرگىم كەلمەدى. مەن ەشقاشان قورىقپادىم”، – دەدى عاني CNN ارناسىنا بەرگەن سۇحباتىندا.
اۋعانستاننىڭ ەكس-پرەزيدەنتىنىڭ ايتۋىنشا، باستاپقىدا ەلدەن كەتۋ ويىندا بولماعان. سونداي-اق، ەلدەن كەتكەندە قولىندا پاسپورتى بولماعانىن ايتتى. «قوماقتى اقشامەن قاشىپ كەتتى» دەگەن اقپاراتتى دا جوققا شىعاردى.
ايتا كەتەيىك، «تاليبان» – لاڭكەستىك ارەكەتى ءۇشىن بۇۇ سانكتسيا سالعان ۇيىم.
”ادىرنا” ۇلتتىق پورتالى
